नेपालगञ्ज, २२ कात्तिक । जाजरकोट र रुकुम पश्चिमका भूकम्प प्रभावितलाई बाँकेवाट थप २ लाख २५ हजार बराबरको सहायता सामग्री पठाइएको छ । बाँकेको नरैनापुर गाउँपालिकाले आज उक्त सहायता सामग्री पठाएको हो ।
उक्त सहायता सामग्री बाँकेको प्रमुख जिल्ला अधिकारी श्रवणकुमार पोखरेलमार्फत सहायता पठाइएको सो गाउँपालिकाका प्रमुख प्रशासकिय अधिकृत मणिराम खरालले बताउनुभयो ।
प्रमुख प्रशासकिय अधिकृत खरालसहित वडा नं ४ का अध्यक्ष मनोज शर्मा र वडा नं. ५ का अध्यक्ष कृष्णचन्द मौर्यले सहायता सामग्री सहितको पत्र हस्तान्तरण गर्नुभएको हो । गाँउपालिका प्रेस विज्ञ आलम खाका अनुसार, सहायता सामग्रीमा चामल, दाल, नून, आयोडिनलगायतका रहेका छन् ।
गाउँपालिकाले घाइतेहरुको स्वास्थ्यपचार, उद्धार तथा राहतका लागि जुट्न आग्रह गर्दै गाउँपालिकाबाट समेत सो कार्यका लागि सामग्री पठाइएको र एम्बुलेन्स तयारी अवस्थामा राखिएको जनाइएको छ ।
यही कात्तिक १७ गतेशुक्रबार मध्यरातमा जाजरकोटको रामीडाँडा केन्द्रबिन्दु भएर गएको भूकम्पबाट जाजरकोट र रुकुमपश्चिममा १५३ जनाको मृत्यु भएको छ भने दर्जनौको संख्यामा घाइते स्थानीयहरुको विभिन्न जिल्लाका अस्पताल तथा स्वास्थ्य केन्द्रहरुका उपचार भइरहेको छ
यसैबीच, नरैनापुर गाउँपालिकाका अध्यक्ष इस्तियाक अहमद शाहले भुकम्पबाट ज्यान गुमाएका प्रति श्रद्धान्जली अर्पण र मृतकका परिवारमा समबेदना प्रकट गर्दै घाइतेहरुको शिघ्र स्वास्थ्यलाभको कामना गर्नुभएको छ ।
