नेपालगञ्ज, २१ साउन । भारतको श्रावस्ती जिल्लामा हिजो राति भएको कार दुर्घटनामा मृत्यु हुने नेपाली नागरिकको नाम प्रहरीले खुलाएको छ । प्रहरीका अनुसार उक्त दुर्घटनामा नेपालगन्जका ६ जनाको मृत्यु भएको छ ।
दुर्घटनामा नेपालगन्जस्थित त्रिभुवन चोकस्थित एस कुमार वाच कम्पनीका सञ्चालक सन्तोष गुप्ताका २२ वर्षीय छोरा निलान्स गुप्ता र २० वर्षीया छोरी सुनिती गुप्ताको मृत्यु भएको छ ।
त्यस्तै नेपालगन्जका औषधि व्यवसायी दिनेश गुप्ताका छोरा ३५ वर्षीय बैभव गुप्ता, बुहारी ३२ वर्षीया दिपीका गुप्ता, नातिनीहरु डल्लु गुप्ता र श्रीया गुप्ताको उक्त दुर्घटनामा मृत्यु भएको जिल्ला प्रहरी कार्यालय बाँकेले जनाएको छ । दुर्घटनामा गम्भीर घाइते कारका चालक अजय मिश्रको उपचार भइरहेको छ । बाँके प्रहरीले मृतकहरुको बहराइचमा पोस्टमार्टम पश्चात शव नेपालगन्ज ल्याउनका लागि आवश्यक प्रक्रियाको तयारी गरिरहेको जनाएको छ ।
प्रहरीका अनुसार भारत उत्तर प्रदेशको बलरामपुरबाट नेपालगन्ज आउँदै गरेको युपी ४७ डब्लु १२१७ नम्बरको कार श्रावस्ती जिल्लाको इकौना नजिक सडकमा गाईसँग ठोक्किँदा दुर्घटना भएको हो ।
