नेपालगञ्जमा निर्माणाधिन जेष्ठ नागरिक मिलन केन्द्र भवनका लागि सहयोग संकलन हुँदै

नेपालगञ्ज, १३ असार । नेपालगञ्जमा निर्माणाधिन जेष्ठ नागरिक मिलन केन्द्रको नयाँ भवनका लागि आर्थिक सहयोग संकलन हुन थालेको छ । नगरवको वडा नंं १२ मा निर्माणाधिन जेष्ठ नागरिक मिलन केन्द्रका लागि झण्डै डेढ करोड खर्च लाग्ने वडा अध्यक्ष तरुणकुमार बज्राचार्यले जानकारी दिनुभयो । वडा अध्यक्ष बज्राचार्यका अनुसार, पछिल्लो पटक वडा नं. १२ निवासी गणेशराज पोखरेलले १ लाख १ हजार सहयोग गर्नुभएको छ । त्यस्तै सिटिजन बैंक नेपालगञ्जवाट १ लाख १ हजार र शिवराज बर्मावाट ११ हजार रुपैयाँ सहयोग प्राप्त भएको छ ।
केहि समयअघि भवन निर्माणका लागि सार्वजनिकरुपमा सहयोगको आह्वान गरिएपछि यसरी सहयोग जुटन थालेको जेष्ठ नागरिक क्लबका अध्यक्ष अजितकुमार शर्माले बताउनुभयो । त्यस्तै सोही वडाका समाजसेवी गोपाल मल्ल ठकुरीले ५ लाख, रमेशकुमार श्रेष्ठले १ लाख १ हजार, प्रमोद जलानले ५१ हजार, कन्हैयालाल बैद्यले ३५ हजार, बिक्रम शाहले २१ हजार, राघव शाहले १५ हजार र राजेन्द्र केसीले ११ हजार गर्नुभएको छ । यसअघि भवन निर्माणका लागि बाँकेको निवर्तमान प्रदेश सांसद सुरेन्द्र हमालको संसदीय कोषबाट २० लाख रकम प्राप्त भएको थियो ।
भवन निर्माणका लागि वडा नंं १२ ले १ करोड ४७ लाखको लागत इस्टिमेट तयार गरेको छ भने वठा कार्यालयवाट आगामी आर्थिक बर्षका लागि १० लाख रकम छुट्याएको वडा अध्यक्ष बज्राचायले जानकारी दिनुभयो ।
योजना अनुसार एक कट्ठा जग्गामा निर्माण हुने उक्त भवन सुबिधा सम्पन्न बनाइनेछ । उक्त भवनमा ६० वर्षमाथिका जेष्ठ नागरिकहरुले धार्मिक, आध्यात्मिक, सचेतनामूलक, सिर्जनात्मक क्रियाकलाप गर्न पाउने जनाइएको छ ।