नेपालगञ्ज, २७ बैशाख । बाँके प्रहरीले स्वचालित (अटोमेटिक) पेस्तोलसहित ३ जनालाई पक्राउ गरेको छ । जिल्ला प्रहरी कार्यालयवाट खटिएको प्रहरी टोलीले मंगलवार राति साढे ११ बजे नेपालगञ्ज वडा नंं १२ स्थित त्रिङ्गक्रस क्लबवाट पेस्तोल एक थान र त्यसमा प्रयोग हुने गोलीसहितको म्यागजिन एक थान बरामद गरेको हो । पेस्तोलसंगै प्रहरीले बर्दियाका सुमन रिजाल, सागर शाह र बाँके कोहलपुरका धर्म पुनमगरलाई समेत पक्राउ गरेको छ ।
प्रहरीले उक्त क्लवको भुई तलामा रहेको ट्वाईलेटको फ्लसभित्र लुकाएर राखिएको अमेरिकामा निर्मित पेस्तोल बरामद गरेको जनाएको छ । यसैगरी, प्रहरीले पक्राउ परेका आरोपीहरुले प्रयोग गर्ने बा ११ च ८०० नं. को कार र कारमा लुकाई राखेको लामो खुकुरीसमेत बरामद गरेको जनाएको छ ।
