नेपालगञ्ज, १९ बैशाख । छिमेकी राष्ट्र भारतमा स्थानीय निर्वाचन हुन लागेपछि बाँकेको जमुनहालगायतका सबै सीमानाकाहरु बन्द भएका छन् ।
बाँकेसंग सीमा जोडिएको भारतको बहराइच र श्रावस्ती दुई जिल्लाको सीमानाका ४८ घण्टासम्म बन्द गरिएको सहायक प्रमुख जिल्ला अधिकारी टोपेन्द्र केसीले जानकारी दिनुभयो ।
उहाँका अनुसार, सीमानाका आज साँझ ६ बजेदेखि २१ गते साँझ ६ बजेसम्म बन्द गरिएका छन् । सीमानाका बन्द अवधिमा हरियो तरकारी, माछा, दूध, पेट्रोलियम पदार्थ, एम्बुलेन्स, शव बाहन आउजाउमा भने रोक नलगाएको जनाइएको छ ।
भारत र नेपालमा हुने चुनावको बेलामा आपराधिक गतिविधि हुन नदिने उद्देश्यले दुवै देशले सीमानाका बन्द गर्दै आएका छन् ।
