नेपालगन्ज, १३ साउन । बाँके कोहलपुरका २१ वर्षीय सर्जन बिकको हत्याको रहस्य खुलेको छ । ठुलो रकमको बीमा गरी भुक्तानी लिन विकको हत्या भएको थियो । केन्द्रीय अनुसन्धान ब्युरो (सीआईबी)ले शुक्रवार पत्रकार सम्मेलन गरी हत्याको रहस्य सार्वजनिक गरेको हो । प्रहरीले बिकको हत्या र हत्यापश्चात् बीमा रकम असुल गरिएको सम्बन्धमा ६ जनालाई पक्राउ गरी संगठित अपराध र ठगीमा म्याद थप गरी अनुसन्धान शुरु गरिसकेको छ ।
प्रहरीले बाँके कोहलपुरका सपना मल्ल, सञ्जीव अर्याल, सरदार अहमद खाँ, टोपबहादुर राना, दीपक केसी र ललिता सापकोटालाई हत्या र संगठित अपराध अन्तर्गत पक्राउ गरेको सीबिआईले जनाएको छ । गिरोहले गरिब परिवारका युवकलाई डिपेण्डेण्ट भिसामा अस्ट्रेलिया लैजाने भन्दै नक्कली विवाह गराई २ करोड ५० लाख रुपैयाँको बीमासमेत गराएको पाइएको छ । नक्कली विवाह गरी इच्छाइएको व्यक्तिको नाममा नक्कली श्रीमतीको नाम राखी बैंक खाता खोलिएको र बीमा गराइएको रहस्य खुलेको छ ।
वार्षिक आम्दानी २ लाख मात्रै भएका युवकको २ करोड ५० लाख रुपैयाँ बराबरको बीमा गराइएको र ती युवकलाई योजनामै हत्या गरिएको पाइएको छ । हत्यापछि इन्सुरेन्सबाट आएको पैसा गिरोहका सदस्यहरूले बाँडेर लिएका थिए ।
