विपी स्मृति दिवस नेपालगञ्जमा पनि मनाइयो

नेपालगञ्ज, ६ साउ । आज विपी स्मृति दिवस नेपालगन्जमा पनि मनाइएको छ । नेपालगन्जमा नेपाली कांग्रेस बाँकेले कार्यक्रमको आयोजना गरी विपी स्मृति दिवस मनाएको हो । बाँके कांग्रेसका नेता, कार्यकर्ताहरुले नेपालगन्जको विपीचोकस्थित विपीको पूर्णकदको शालिकमा माल्र्यापण गरी स्वर्गीय विशेश्वरप्रसाद कोइरालाप्रति भावपूर्ण श्रद्धान्जली अर्पण गरेका थिए ।
बाँके कांग्रेस सभापति नारायणप्रसाद गौडेल, सचिव सुधांशु कोइराला, कोषाध्यक्ष यज्ञबहादुर बस्नेत लगायत नेता कार्यकर्ताले वीपीको शालिकमा माल्यार्पण गर्नुभएको थियो । यसैगरी, नेपालगन्जको सुर्खेतरोडस्थित पार्टी कार्यालयमा वीपीको शालिकमा पनि माल्यार्पण गरिएको छ । दिवसका अवसरमा नेपालगन्ज वडा नं. १० स्थित शारदा आधारभूत विद्यालय प्रांगणमा वृक्षारोपण गरिएको थियो ।
नेपालमा प्रजातन्त्र स्थापनाका लागि कठोर सङ्घर्ष गर्नुभएका विशेश्वरप्रसाद कोइरालाको जन्म १९७१ साल भदौ २४ गते भएको थियो भने २०३९ साल साउन ६ गते निधन भएको थियो । २०१५ सालको संसदीय चुनावपछि २०१६ साल जेठमा उहाँ पहिलो निर्वाचित प्रधानमन्त्री बन्नुभएको थियो ।