थुनिएका नाला खुलाउदै नेपालगन्जका मेयर विष्ट

नेपालगञ्ज, १५ असार । गएरातिदेखि परेको अविरल झरीपछि पानीको सहज निकास नपाएर थुनिएको नालाको निकासा खुलाउन जेसिबीसहित नेपालगञ्जका मेयर प्रशान्त विष्ट फिल्डमा खटिएका छन् । आज बिहानैदेखि वडा नम्बर ४ र ६ का विभिन्न बस्तीहरुमा पुगेर मेयर विष्ट नालाको निकास खुलाउन लागिपर्नु भएको हो । वडा नम्बर ४ को सेतु विकचोक नजिकै न्यूरोडमा नाला अबरुद्ध हुँदा सडकमा पानी जमेको पानीको निकासा खुलाउन छाता ओढेर फिल्डमा खटिनु भएको थियो । त्यस्तै बसपार्कदेखि वडा नम्बर ६ को पुरैनी कान्तिताल जाने बाटोमा टोलमा निकास नपाएर थुनिएको पानीलाई जेसिबीको सहायताबाट ह्युमपाइप सफा गरी निकास दिइएको छ । कतिपय नाला भएको ठाउँमा बाटो र घर वरिपरि जम्मा भएको पानीलाई पनि निकास दिइएको छ । पानीको निकासा खुलाउने क्रममा मेयर विष्टले स्थानीयको आक्रोशको पनि सामना गर्नु परेको थियो । उपमहानगरपालिकाले बर्षा सुरु हुनुअघि नै नगरका केहि स्थानको नाला सफा गरे पनि अधिकांश स्थान र टोलका नाला सफाई हुन सकेको थिएन् । त्यसैको फलस्वरुप नगरका अधिकांश स्थानमा पानीले सहज निकास पाउन सकेको छैन् ।