काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले गठबन्धन नहुने अवस्था रहेमा एक्लै भिड्न तयार रहेको बताएका छन् ।
माओवादीले आयोजना गरेको पत्रकार सम्मेलनमा संचारकर्मीको प्रश्नमा जवाफ दिँदै अध्यक्ष प्रचण्डले भने– ‘हाम्रो प्राथमिकता गठबन्धन हो । गठबन्धन गरेरै जाने पहिलो कुरा हो । यदि, गठबन्धन नहुने अवस्थामा कोही पुग्न चाहन्छ भने माओवादी एक्लै भिड्न तयार छ । त्यसका लागि तीन महिना अगाडिदेखि नै तयारी गरिरहेका छौं ।’
अध्यक्ष प्रचण्डले वर्तमान पाँच दलबीच गठबन्धन कायम नरहे अरु शक्तिहरुसँग पनि गठबन्धन गरेर जान सकिने सम्भावना रहेको समेत बताएका छन् । उनले भने– ‘हामी वर्तमान गठबन्धनभन्दा बेग्लै गठबन्धनको पक्षमा छैनौं । तर, गठबन्धन नै नहुने अवस्था आयो भने बेग्लै गठबन्धन बन्न सक्छ । त्यसका लागि हामी तयार छौं ।
पत्रकार सम्मेलनमार्फत अध्यक्ष प्रचण्डले आज साँझ सम्ममा गठबन्धनले महानगरपालिका र उपमहानगरपालिकाको सिट बाँडफाँट टुंगो लगाउने समेत जानकारी गराएका छन् । उनले भने– ‘गठबन्धन बैठकबाट भर्खरै आएको हुँ । आधारभूत सहमति भइसकेको छ । आज साँझ सम्ममा सबै टुंगो लाग्छ ।
