गेरुवा, (बर्दिया)२४ भदाै । बर्दियाको गेरुवा गाउँपालिका अन्तर्गतका सामुदायिक विद्यालयमा कार्यरत प्रारम्भिक तहका शिक्षकहरूका लागि एकीकृत पाठ्यक्रमसम्बन्धी तीनदिने तालिम मंगलबार सम्पन्न भएको छ । भदौ २१ देखि २३ गतेसम्म सञ्चालन भएको तालिम गेरुवा गाउँपालिका र सुरक्षित भविष्य परियोजनाको सहकार्यमा आयोजना गरिएको हो ।
तालिममा गेरुवा गाउँपालिकाका सबै सामुदायिक विद्यालयहरूबाट प्रारम्भिक तहमा अध्यापनरत २६ जना शिक्षकहरूको सहभागिता रहेको थियो । प्रारम्भिक तहका शिक्षकहरूलाई एकीकृत पाठ्यक्रमको अवधारणा, बालकेन्द्रित तथा सहभागितामूलक शिक्षण विधि, विषयवस्तुलाई बालबालिकाको दैनिक जीवनसँग जोडेर सिकाउने तरिका तथा कक्षाकोठामा एकीकृत पाठ्यक्रमलाई प्रभावकारी रूपमा कार्यान्वयन गर्ने विषयमा आवश्यक ज्ञान, सीप र व्यावहारिक क्षमता प्रदान गर्नु नै तालिमको उद्देश्य रहेको बताइएको छ ।
तालिमको सहजीकरण प्रशिक्षक नन्दकला खत्रीले गर्नुभएको थियो भने सहभागि शिक्षकहरूलाई सैद्धान्तिक ज्ञानका साथै समूहगत छलफल, अभ्यास, प्रस्तुतीकरण तथा कक्षाकोठामा प्रयोग गर्न सकिने विभिन्न व्यावहारिक विधिहरूमार्फत एकीकृत पाठ्यक्रम कार्यान्वयनका विषयमा जानकारी गराइएको थियो ।
तालिममा गेरुवा गाउँपालिका शिक्षा शाखा प्रमुख नवराज अधिकारी, राधाकृष्ण थारु जनसेवा केन्द्रका सचिव युवराज श्रेष्ठ, सुरक्षित भविष्य परियोजनाका परियोजना संयोजक मनोज पौडेल तथा शिक्षा प्राविधिक अधिकृत सीमा ओलीको सहभागिता रहेको थियो ।
कार्यक्रममा शिक्षा इकाइ प्रमुख नवराज अधिकारीले प्रारम्भिक तहका बालबालिकाको सिकाइलाई प्रभावकारी, व्यवहारिक र बालमैत्री बनाउन एकीकृत पाठ्यक्रमको सही कार्यान्वयन अत्यन्त महत्वपूर्ण रहेको बताउनुभयो। उहाँले तालिमबाट प्राप्त ज्ञान र सीपलाई शिक्षकहरूले नियमित कक्षाकोठाको अभ्यासमा रूपान्तरण गर्न सकेमा बालबालिकाको सिकाइ उपलब्धिमा सकारात्मक प्रभाव पर्ने विश्वास व्यक्त गर्नुभयो ।
राधाकृष्ण थारु जनसेवा केन्द्रका सचिव युवराज श्रेष्ठले गुणस्तरीय शिक्षाका लागि शिक्षकहरूको निरन्तर क्षमता विकास आवश्यक रहेको बताउँदै स्थानीय सरकार, विद्यालय र विकास साझेदारबीचको सहकार्यले शिक्षा क्षेत्रमा प्रभावकारी तथा दिगो परिणाम ल्याउन सक्ने धारणा राख्नु भयो ।
परियोजना संयोजक मनोज पौडेलले प्रारम्भिक तहको सिकाइले बालबालिकाको आधार निर्माण हुने महत्वपूर्ण चरण भएकाले यस तहमा कार्यरत शिक्षकहरूको क्षमता अभिवृद्धिलाई परियोजनाले प्राथमिकताका साथ अघि बढाएको बताउनुभयो ।
शिक्षा प्राविधिक अधिकृत सीमा ओलीले एकीकृत पाठ्यक्रमलाई केवल पाठ्यक्रमको नयाँ अवधारणाका रूपमा मात्र नहेरी त्यसलाई कक्षाकोठाको दैनिक शिक्षण अभ्याससँग जोडेर कार्यान्वयन गर्नुपर्नेमा जोड दिनुभयो ।
तालिममा सहभागी शिक्षकहरूले एकीकृत पाठ्यक्रमको अवधारणा तथा त्यसलाई कक्षाकोठामा प्रयोग गर्ने व्यावहारिक विधिबारे थप स्पष्टता प्राप्त भएको प्रतिक्रिया जनाएका थिए ।
सुरक्षित भविष्य परियोजना बर्दिया जिल्लामा राधाकृष्ण थारु जनसेवा केन्द्र, बाँके युनेस्को क्लब र प्लान इन्टरनेशनल नेपालको सहकार्यमा कार्यान्वयन हुँदै आएको छ । परियोजनाले बालबालिका, किशोरकिशोरी तथा युवाहरूका लागि सुरक्षित भविष्य निर्माणका साथै शिक्षा लगायतका क्षेत्रमा स्थानीय सरकार तथा अन्य सरोकारवालासँगको सहकार्यमा विभिन्न क्षमता विकास तथा प्रणाली सुदृढीकरणका कार्यक्रम सञ्चालन गर्दै आएको जनाइएको छ।
