बर्दियाको ठाकुरबाबा र मधुवनमा यति परियोजनाको बैठक
बर्दिया, १९ भदौ । बाँके युनेस्को क्लब र प्लान इन्टरनेशनल नेपालको साझेदारीमा सञ्चालित दोस्रो चरणको यति परियोजनाअन्तर्गत बर्दियाका मधुवन नगरपालिका र ठाकुरबाबा नगरपालिकामा परियोजना प्रारम्भ बैठक सम्पन्न भएका छन् ।
परियोजनाको समग्र लक्ष्य, उद्देश्य, कार्यान्वयन रणनीति, प्रस्तावित गतिविधि तथा अपेक्षित उपलब्धिबारे स्थानीय सरकारका प्रतिनिधि तथा सम्बन्धित सरोकारवालालाई जानकारी गराउँदै परियोजनाको प्रभावकारी कार्यान्वयनका लागि समन्वय, सहकार्य र स्थानीय स्वामित्व अभिवृद्धि गर्ने उद्देश्यले बैठक आयोजना गरिएको हो ।
मधुवन नगरपालिकामा आयोजित बैठक नगर प्रमुख तेजबहादुर भाटको अध्यक्षतामा सम्पन्न भएको थियो । उपप्रमुख अनिता चौधरी प्रमुख अतिथि रहनुभएको कार्यक्रममा कार्यवाहक प्रमुख प्रशासकीय अधिकृत पार्वती पण्डित, वडा नम्बर १ र २ का वडाध्यक्ष, बालबालिका तथा महिला शाखा, पशु सेवा शाखा, योजना शाखा, रोजगार शाखा तथा उद्यम विकास शाखाका प्रतिनिधि, युवा उद्यमी तथा नगरपालिकाका सफल एवं स्थापित उद्यमीहरूको सहभागिता रहेको थियो ।
कार्यक्रमलाई पशु सेवा शाखाका प्रमुख गणेशबहादुर बोहोरा र फिल्ड अफिसर सुनीता चौधरीले सहजीकरण गर्नुभएको थियो ।
यसैगरी, ठाकुरबाबा नगरपालिकामा पनि परियोजना प्रारम्भ बैठक नगर प्रमुख तिलकराम लामिछानेको अध्यक्षतामा सम्पन्न भएको थियो । उपप्रमुख बीना कुमारी भट्टराई अतिथिका रूपमा सहभागी हुनुभएको बैठकमा कार्यवाहक प्रमुख प्रशासकीय अधिकृत रामहरि रिजाल, वडा नम्बर ३, ४ र ५ का वडाध्यक्ष, बालबालिका तथा महिला शाखा, पशु सेवा शाखा, योजना शाखा, रोजगार शाखा, उद्यम विकास शाखाका प्रतिनिधि, युवा उद्यमी तथा सफल एवं स्थापित उद्यमीहरूको सहभागिता रहेको थियो ।
कार्यक्रमलाई योजना शाखाका प्रमुख अनन्तराज सुवेदी र फिल्ड अफिसर सृजना थारूले सहजीकरण गर्नुभएको थियो ।
दुबै ठाउँका बैठकमा बाँके युनेस्को क्लबका कार्यकारी निर्देशक रवि कुमार तुलाधर, सपना परियार तथा क्लबका सदस्य शंकर सिंह थारूको सक्रिय सहभागिता रहेको थियो ।
सोही प्रकारले दुबै ठाउँका बैठकमा परियोजना संयोजक राधेकृष्ण थारूले परियोजनाको पहिलो चरणअन्तर्गत आर्थिक वर्ष २०२६ मा हासिल भएका उपलब्धि तथा परियोजनाको प्रभावबारे प्रस्तुतीकरण गर्नुभएको थियो । उहाँले हालै सुरु गरिएको दोस्रो चरणको परियोजनाका लक्ष्य, उद्देश्य, कार्यनीति, कार्यान्वयन प्रक्रिया, प्रस्तावित कार्यक्रम, बजेट तथा अपेक्षित उपलब्धि र प्रभावबारे जानकारी गराउनुभयो ।
छलफलका क्रममा जलवायु अनुकूल व्यवसाय तथा हरित रोजगारीमार्फत रोजगारी र स्वरोजगारीका अवसर सिर्जना गर्ने, युवा उद्यमशीलता प्रवद्र्धन गर्ने, युवाको सीप तथा क्षमता विकास गर्ने र जलवायु परिवर्तन तथा विश्वव्यापी तापक्रम वृद्धिका असर न्यूनीकरणमा युवालाई सक्रिय बनाउने विषयमा विशेष जोड दिइएको थियो ।
साथै, परियोजनाको पहिलो चरणमा स्थापना भएका उद्यमलाई दिगो बनाउँदै थप सुदृढ र विस्तार गर्नुपर्ने आवश्यकता पनि बैठकमा औँल्याइएको थियो ।
बैठकमा सहभागीहरूले परियोजनाका गतिविधिको प्रशंसा गर्दै प्रभावकारी कार्यान्वयनका लागि आवश्यक समन्वय, सहयोग र सहकार्य गर्ने प्रतिबद्धता व्यक्त गरेका थिए ।
