राजापुर (बर्दिया), २६ जेठ । मानव बेचबिखन तथा लागूऔषध दुव्र्यसन न्यूनीकरणका साथै बालबालिका, युवा तथा जोखिममा रहेका समुदायको संरक्षणका लागि सामुदायिकस्तरमा जनचेतना अभिवृद्धि गर्न बर्दियाको राजापुरमा सचेतना कार्यक्रम गरिएको छ । बाँके युनेस्को क्लब, प्लान इन्टरनेशनल नेपाल तथा राजापुर नगरपालिकाको संयुक्त आयोजनामा सुरक्षा परियोजना अन्तर्गत कार्यक्रम गरिएको हो ।
विद्यार्थी, युवा, अभिभावक, स्थानीय समुदाय तथा विभिन्न सरोकारवाला निकायका प्रतिनिधिहरूको सहभागिता रहेको कार्यक्रममा मानव बेचबिखन तथा लागूऔषध दुव्र्यसनका कारण व्यक्ति, परिवार र समाजमा पर्ने नकारात्मक प्रभावबारे जानकारी दिइएको थियो भने रोकथाममा समुदायको भूमिकाबारे समूहगत छलफल समेत गरिएको थियो।
कार्यक्रमका सहजकर्ता इलाका प्रहरी कार्यालय राजापुरका प्रहरी नायव उपरीक्षक होमप्रसाद चौधरीले मानव बेचबिखन तथा लागूऔषध सम्बन्धी अपराध नियन्त्रणका लागि समुदायमा सचेतना, सतर्कता र समयमै सूचना प्रवाहको आवश्यकता रहेकोमा जोड दिनुभयो ।
त्यसैगरी, महिला तथा बालबालिका शाखाकी अनिता चौधरीले बाल संरक्षण, महिला तथा बालअधिकार, उपलब्ध सहयोग संयन्त्र तथा मानव बेचबिखन, हिंसा र शोषणसम्बन्धी कानुनी व्यवस्थाबारे जानकारी गराउनुभएको थियो ।
क्लबका अध्यक्ष प्रवेजअलि सिद्दिकीले बालबालिका सुरक्षित, युवा सशक्त र परिवारहरू हिंसा तथा शोषणमुक्त वातावरणमा जीवनयापन गर्न सक्ने समाज निर्माणका लागि कार्यक्रमले महत्वपूर्ण योगदान पुर्याउने विश्वास व्यक्त गर्नुभयो ।
