सरोकारवालाहरूको सामूहिक प्रतिबद्धता
राजापुर (बर्दिया), मानव बेचबिखनको रोकथाम तथा नियन्त्रण र यससँग सम्बन्धित सामाजिक समस्याहरूको सम्बोधन गर्न सामूहिक प्रयासलाई सुदृढ बनाउने उद्देश्यले राजापुर नगरपालिकामा सरोकारवालाहरूसँग सिकाइ, अनुभव आदानप्रदान तथा समन्वय बैठक सम्पन्न भएको छ। उक्त बैठक बाँके युनेस्को क्लब र प्लान इन्टरनेशनल नेपालको साझेदारीमा सञ्चालित सुरक्षा परियोजना अन्तर्गत सहयोग गरिएको थियो।
राजापुर नगरपालिकाका उपप्रमुख मनकला कुमारी चौधरीको अध्यक्षतामा सम्पन्न बैठकमा प्रमुख प्रशासकीय अधिकृत मानबहादुर गिरी, शिक्षा निर्देशक टीकानाथ गोसाई,वडा अध्यक्षहरू, इलाका प्रहरी कार्यालय राजापुरका प्रहरी नायब उपरीक्षक (डीएसपी) होमप्रकाश चौधरी, मानव बेचबिखन नियन्त्रणका लागि गठित स्थानीय समिति का सदस्यहरू, सञ्चारकर्मी तथा विभिन्न गैरसरकारी संस्थाका प्रतिनिधिहरूको सहभागिता रहेको थियो। राजापुर नगरपालिकाको महिला तथा बालबालिका शाखा प्रमुख अनिता चौधरीले कार्यक्रम सञ्चालन गर्नुभएको थियो।
बैठकको मुख्य उद्देश्य सुरक्षा परियोजनाको प्रगति तथा उपलब्धिहरूको समीक्षा र अनुभव आदानप्रदान गर्नु, मानव बेचबिखन रोकथाम तथा बाल संरक्षण सुदृढीकरणमा परियोजनाले पुर्याएको योगदानको समीक्षा गर्नु, देखिएका चुनौतीहरू पहिचान गर्नु तथा स्थानीय सरकार, विद्यालय, समुदाय, नागरिक समाज र अन्य सरोकारवालाहरूबीचको समन्वयलाई थप प्रभावकारी बनाउनु रहेको थियो।
बैठकमा सुरक्षा परियोजनाका परियोजना संयोजक ईश्वर बी.के. ले परियोजनाको समग्र प्रगति तथा प्रमुख उपलब्धिहरू प्रस्तुत गर्नुभएको थियो। उहाँको प्रस्तुतिमा समुदायमा जनचेतना अभिवृद्धि, बाल संरक्षणका संयन्त्रहरूको सुदृढीकरण, सकारात्मक अभिभावकत्व अभ्यासको प्रवर्द्धन, बालबालिका तथा युवाहरूको सचेतनामूलक गतिविधिमा सहभागिता र मानव बेचबिखन तथा यससँग सम्बन्धित जोखिमहरू रोकथामका लागि सरोकारवालाहरूको परिचालनलगायतका विषय समेटिएका थिए।
बैठकमा मानव बेचबिखन, लागुऔषध दुरुपयोग, बालविवाह तथा विद्यालय छाड्ने समस्याजस्ता एकअर्कासँग सम्बन्धित सामाजिक चुनौतीहरूबारे गहन छलफल भएको थियो। सहभागीहरूले यी समस्याहरूको प्रभावकारी सम्बोधनका लागि समन्वयात्मक, रोकथाममुखी तथा समुदायमा आधारित पहलहरू आवश्यक रहेकोमा जोड दिएका थिए। विशेषगरी अभिभावक शिक्षा कार्यक्रमलाई सुदृढ बनाउने, उच्च जोखिममा रहेका परिवारहरूको पहिचान गरी आवश्यक सहयोग उपलब्ध गराउने, समुदायस्तरमा जनचेतना अभिवृद्धि गर्ने, बालबालिकाको विद्यालयमा निरन्तरता सुनिश्चित गर्ने तथा जोखिममा रहेका बालबालिकालाई समयमै संरक्षण र आवश्यक सेवा उपलब्ध गराउने विषयमा जोड दिइएको थियो।
बैठकमा आफ्ना धारणा राख्दै प्रमुख प्रशासकीय अधिकृत मान बहादुर गिरी र शिक्षा निर्देशक टीकानाथ गोसाई ले मानव बेचबिखन तथा बाल संरक्षणसम्बन्धी चुनौतीहरूको सम्बोधनमा संस्थागत जिम्मेवारी र समन्वयात्मक कार्यको महत्त्व औँल्याउनुभएको थियो। उहाँहरूले जोखिममा रहेका बालबालिकाको पहिचान, विद्यालय छाड्ने दर न्यूनीकरण, बालमैत्री वातावरण निर्माण तथा रोकथामसम्बन्धी कार्यक्रमहरूको प्रभावकारी कार्यान्वयनका लागि शिक्षा क्षेत्र, स्थानीय सरकार, विद्यालय तथा समुदायका सरोकारवालाहरूबीच सहकार्य थप सुदृढ गर्नुपर्नेमा जोड दिनुभएको थियो।
समापन मन्तव्य राख्दै राजापुर नगरपालिकाका उपप्रमुख श्रीमती मनकला कुमारी चौधरी ले सुरक्षा परियोजनामार्फत बाँके युनेस्को क्लब र प्लान इन्टरनेशनल नेपालले पुर्याउँदै आएको योगदानको प्रशंसा गर्नुभएको थियो। उहाँले मानव बेचबिखन रोकथाम तथा लागुऔषध दुरुपयोग, बालविवाह र विद्यालय छाड्ने समस्याको सम्बोधनका लागि निरन्तर प्रतिबद्धता, साझा जिम्मेवारी र सार्थक सहकार्य आवश्यक रहेको बताउनुभयो। साथै, विशेषगरी जोखिममा रहेका बालबालिका तथा परिवारलाई प्राथमिकतामा राख्दै बैठकमा भएका छलफल र प्रतिबद्धतालाई वडा तथा समुदायस्तरमा व्यवहारिक कार्यमा रूपान्तरण गर्न सबै सरोकारवालाहरूलाई आग्रह गर्नुभयो।
यस बैठकले मानव बेचबिखन रोकथाम तथा बाल संरक्षणका लागि समाजका सबै तहमा सामूहिक जिम्मेवारी, निरन्तर समन्वय र व्यवहारिक कार्य आवश्यक रहेको साझा बुझाइलाई थप सुदृढ बनाएको छ। सहभागीहरूले स्थानीय मानव बेचबिखन नियन्त्रण समितिको कार्यप्रणालीलाई प्रभावकारी बनाउने, अभिभावक शिक्षा तथा सामुदायिक जनचेतनामूलक गतिविधिहरू विस्तार गर्ने, उच्च जोखिममा रहेका परिवारलाई सहयोग गर्ने, बालबालिकाको विद्यालयमा निरन्तरता सुनिश्चित गर्ने, लागुऔषध दुरुपयोग तथा बालविवाह न्यूनीकरणका लागि संयुक्त पहल गर्ने र सूचना आदानप्रदान, संयुक्त अनुगमन तथा आवश्यक सेवा र संरक्षणका लागि सिफारिस प्रणालीलाई सुदृढ बनाउने प्रतिबद्धता व्यक्त गरेका थिए।
बैठकको अन्त्यमा राजापुर नगरपालिका, बाँके युनेस्को क्लब, प्लान इन्टरनेशनल नेपाल, विद्यालय, वडा कार्यालय तथा समुदायमा आधारित संयन्त्रहरूबीच सहकार्यलाई निरन्तरता दिँदै बाल संरक्षणलाई सुदृढ बनाउने र सुरक्षित, समावेशी तथा बालमैत्री समुदाय निर्माणमा योगदान पुर्याउने साझा प्रतिबद्धता व्यक्त गरिएको थियो।
सुरक्षा परियोजना प्लान इन्टरनेशनल नेपालको साझेदारीमा बाँके युनेस्को क्लबद्वारा कार्यान्वयन भइरहेको छ। परियोजनाले बाल संरक्षण सुदृढीकरण तथा सुरक्षित समुदाय निर्माणका लागि सम्बन्धित सरोकारवालाहरूसँग सहकार्य गर्दै आएको छ।
