नेपालगञ्ज । चलचित्र पत्रकार संघ नेपाल बाँके शाखाको तेस्रो जिल्ला अधिवेशन आइतबार नेपालगञ्जमा सम्पन्न भएको छ । अधिवेशनले नयाँ कार्यसमिति चयन गर्दै संगठनलाई थप सक्रिय र प्रभावकारी बनाउने प्रतिबद्धता व्यक्त गरेको छ ।
संघका केन्द्रीय अध्यक्ष समिर बलामीको उपस्थितिमा सम्पन्न अधिवेशनबाट रामचन्द्र पौडेल पुनः अध्यक्षमा निर्वाचित भएका छन् । यसैगरी उपाध्यक्षमा समिरमान श्रेष्ठ, सचिवमा लक्ष्मी तिमिल्सेना, सह–सचिवमा रजनी योगी तथा कोषाध्यक्षमा अमृता जैसी (निशु) चयन भएका छन् । सदस्यहरूमा रामप्रसाद आचार्य, सावित्री विश्वकर्मा, मोहम्मद जावेद हलवाई, गणेश राई, सौरभ राना र मनिषा खत्री चयन भएका छन् ।
अधिवेशन उद्घाटन समारोहमा केन्द्रीय अध्यक्ष समिर बलामीले २०४९ सालमा केन्द्रीय समिति गठन गर्दाको परिवेश स्मरण गर्दै चलचित्र पत्रकार संघ अन्य विधागत पत्रकार संघ भन्दा धेरै शाखा भएको संगठन भएको उल्लेख गरे । पछिल्लो समय विशेषगरी चलचित्र पत्रकारितामा पत्रकारिता भन्दा विज्ञापनमुखी प्रवृत्ति बढ्दै गएकोतर्फ संकेत गर्दै उनले चलचित्र मात्र नभई मनोरञ्जन, कला–साहित्य, नाटक तथा रंगमञ्च जस्ता क्षेत्रलाई पनि समेटेर नेतृत्व गर्नुपर्ने धारणा व्यक्त गरे ।
उनले भने, “डिजिटल मिडियाको विस्तारसँगै पत्रकारिता चुनौतीपूर्ण बन्दै गएको छ । कुनै समय पत्रकारिताले समाजलाई मार्गदर्शन गर्थ्यो र हरेक सूचना पत्रकारिताबाट प्राप्त हुन्थ्यो । तर अहिले सामाजिक सञ्जालले समाजलाई प्रभाव पारिरहेको छ । यस्तो अवस्थामा विधागत पत्रकारितालाई बचाउन र सुदृढ बनाउन आवश्यक छ ।”
कार्यक्रममा नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईले बाँके शाखाले चलचित्र पत्रकारिताको क्षेत्रमा उल्लेखनीय गतिविधि गर्दै आएको बताए ।
उनले बाँकेमा कलाकारिता क्षेत्रमा योगदान दिएका विशिष्ट व्यक्तित्वहरूको खोजी, अभिलेखीकरण तथा दस्तावेजीकरण गर्न पनि जोड दिए । त्यस्तै नेपाल पत्रकार महासंघ बाँकेका अध्यक्ष नवीन गिरीले नेपालगञ्जमा नेपाली चलचित्रप्रति आम नागरिकको चासो दिनानुदिन बढ्दै गएको बताए ।
उनले चलचित्र समाजको गतिशील बिम्ब भएकाले सो क्षेत्रमा काम गर्ने पत्रकार अझ संवेदनशील हुनुपर्ने उल्लेख गरे । उनका अनुसार चलचित्र बिटमा काम गर्ने पत्रकारहरूले लेखनको दायरा अझ फराकिलो बनाउन आवश्यक छ । चलचित्र प्रदर्शनका क्रममा तथा प्रदर्शनपछि समिक्षात्मक पत्रकारिता गर्न सकिए समाजलाई सकारात्मक सन्देश प्रवाह गर्न सकिने उनको भनाई थियो ।
अधिवेशनमा शाखाका सल्लाहकार कमल खत्री, नेपाल पत्रकार महासंघ बाँकेका पूर्व अध्यक्ष निरज गौतम लगायत सञ्चारकर्मीहरूको उपस्थिति रहेको थियो ।
