नेपाली कांग्रेस बाँकेका कार्यवाहक सभापति, निर्वाचन परिचालन, प्रचार प्रसार मूल समिति संयोजक गोपाल प्रसाद अधिकारीसँग फागुन २१ गते हुने प्रतिनिधिसभा सदस्य निर्वाचनसँग केन्द्रीत कुराकानी यहाँ प्रस्तुत गरेका छौं ।
फागुन २१ गते प्रतिनिधिसभा निर्वाचन हुँदैछ । समग्रमा अहिलेको निर्वाचनलाई के कसरी हेर्नुभएको छ ?
आसन्न प्रतिनिधिसभा निर्वाचन विशेष परिस्थितिमा भइरहेको छ । यो निवार्चनलाई अत्यन्तै महत्वका साथ हेरिएको छ । अहिले देश अस्थिर र संवैधानिक संकटमा छ । राजनीति प्रदुषित छ । यी सबै कुरालाई लिकमा ल्याउने माध्यम नै निर्वाचन हो । यो अपरिहार्य पनि थियो । आम मतदाताले यो निर्वाचनलाई निकास दिने अवसरका रुपमा सदुपयोग गर्नुपर्ने अवस्था छ ।
काँग्रेस बाँकेका कार्यवाहक सभापति एवं निर्वाचन परिचालन मूल समितिको संयोजकका रूपमा तपाईंले के कसरी भूमिका निर्वाह गरिराख्नु भएको छ ?
पार्टीको दोहोरो भूमिकामा छु । कार्यवाहक सभापतिको रुपमा निर्वाचनका क्रममा अपनाउनुपर्ने सम्पूर्ण जिम्मेवारी पूरा गरिरहेको छु । निर्वाचनका विधि, प्रक्रिया, सीमा र आचारसंहितालाई पनि पालना गर्नुपर्ने दायित्व छ । अर्कोतिर काँग्रेसका उम्मेदवारलाई जिताउनुपर्ने दायित्व छ । निर्वाचनका लागि पार्टीका विभिन्न पंक्ति र तह, भ्रातृ संघ संगठन परिचालन गरिएको छ । काँग्रेसका उम्मेदवारलाई जिताउन सवै पक्षसमक्ष सौहार्दपूर्ण रुपमा प्रस्तुत भइरहेका छौं । उम्मेदवारहरुद्वारा घर दैलोमा पुगेर मतदाताका कुरा सुन्ने, पार्टीको पछिल्लो नीति र एजेण्डा राख्ने र मत माग्ने कार्य भइरहेको छ । निर्वाचनलाई सहज, प्रभावकारी र आफ्नो पक्षमा बनाउन विभिन्न समिति गठन गरी जिम्मेवारीसहित परिचालन गर्ने काम गरिएको छ । पार्टी सभापति गगन थापालाई बोलाएर नेपालगञ्जमा भव्य चुनावी सभा गरियो । बाँके जिल्लालाई काँग्रेसमय बनाउने बातवरण सिर्जना गरियो । जिल्लाको चुनावी अवस्थाको समग्र अनुगमन गरी पार्टीका जिम्मेवार व्यक्तिलाई आवश्यक निर्देशन दिने गरिएको छ ।
३ वटै क्षेत्रमा काँग्रेसका उम्मेदवार मैदानमा छन् ? कुन–कुन क्षेत्रमा कस्तो अवस्था छ ?
नेपाली काँग्रेसका सबै उम्मेदवार उत्साहपूर्ण रुपमा फिल्डमा खटिएका छन् । काँग्रेसका उम्मेदवार घरदैलोमा पुग्दा आम मतदाताले स्वागत गरिरहेका छन् । काँग्रेसका उम्मेदवारप्रति मतदाताको सकारात्मक धारणा छ । उत्साह र हौसला पाउनुभएको छ । उम्मेदवारले आ–आफ्ना घोषणा पत्रहरु सार्वजनिक गरिसकेका छन् । घोषणापत्रहरु आम मतदाता लक्षित र स्थानीय मुदामा केन्द्रीत छन् । क्षेत्रगत अनुसार पार्टीका सबै संरचना र जिम्मेवार साथीहरु स्वयं उम्मेदवार सरह परिचालित छन् । बाँकेका सबै क्षेत्रमा हामी अग्रपंक्तिमा छौं । साथै काँग्रेसले नीति र नेतृत्व फेरेपछि केन्द्रबाट नै पार्टी सुधारिएर आएको आम बुझाई छ । यसले पनि हामीलाई थप मजबुत बनाएको छ ।
तीन वटै उम्मेदवारका विषयमा के कसरी मूल्यांकन गर्नुहुन्छ ?
सबै क्षेत्रका उम्मेदवार योग्य र भरपर्दो हुनुहुन्छ । क्षेत्र नं. १ मा काँग्रेस बाँकेका सभापति नारायण प्रसाद गौडेल उम्मेदवारका रुपमा रहनुभएको छ । कहीँकतै कहिल्यै पनि विवादमा नपरेको, निष्कलंक र सरल व्यक्तित्व हुनुहुन्छ । पार्टीमा निरन्तर योगदान दिएको, कार्यकर्तामाझ भिजेको, सामाजिक मुद्दा उठान गर्ने समाजसेवी हुनहुन्छ । द्वन्दकालमा समेत संगठन निर्माणमा क्रियाशील, इमान्दार र अनुभवी भएकाले आम मतदाताले नजिकबाट बुझेका छन् र रुचाएका छन् । संकटको सारथीको रुपमा पनि आम मतदाताले लिएका छन् ।
क्षेत्र नं. २ का उम्मेदवार शुधान्सु कोइराला युवा पुस्ताको प्रतिनिधित्व गर्नुहुन्छ । किशोरावस्थाबाटै राजनीतिमा लागेको इमान्दार, भरोसायोग्य व्यक्ति हुनुहुन्छ । राजनीतिक (पारिवारिक) पृष्ठभूमि, राजनीतिक संस्कार, स्वच्छ छवि, निष्कलंक व्यक्ति हो । युवाहरुले माया, विश्वास र भरोसा गरेका व्यक्ति कोइरालालाई अब आम मतदाताले पनि विश्वास गर्ने बातावरण बनेको छ ।
क्षेत्र नं. ३ का उम्मदवार अमर सिंह पुन अनुभवी, अभिभावकीय भूमिका निर्वाह गर्न सक्ने, विवादमा नपरेको र स्थानीय मुद्दाको सुनुवाई गर्न सक्ने क्षमता भएको, पार्टीको केन्द्रसम्म पहुँच भएको सरल व्यक्तित्व हुनुहुन्छ । आम मतदाताले सबै उम्मेदवारप्रति माया र विश्वास प्रकट गरेका छन् । मत हालेर जिताउँछन् भन्ने विश्वास गरेको छु ।
निर्वाचन प्रचारप्रसारमा तपाईं आफैं अगुवाई गरिरहनुभएको छ । समग्रमा के कस्तो पाउनुभयो ?
पार्टीको धेरै जिम्मेवारी छन् । सबै क्षेत्रमा सबै प्रकारले प्रचारप्रसार भइरहेको छ । जिल्लामा सौहार्दपूर्ण र उत्साहपूर्ण स्थिति छ । तीन वटै क्षेत्रलाई उत्तिकै महत्व दिएको छु । उम्मेदवार उत्साही छन् । पार्टीका जिम्मेवार साथीहरु खटिनुभएको छ । अन्य पार्टी पनि लागेका छन् । अहिलेसम्म अन्य दलसँगको सम्वन्ध पनि राम्रो छ । निर्वाचन आचारसंहितालाई काँग्रेसले पालना गरेको छ ।
यस पटक जीत सुनिश्चित गर्न मुख्य चुनौतीहरू के–के छन् र तिनलाई कसरी सम्बोधन गर्दै हुनुहुन्छ ?
चुनावमा अनेकन चुनौती हुन्छन्, जुन स्वभाविक पनि हो । नयाँ शक्तिका रुपमा उदाएका पार्टीका क्रियाकलापले आम मतदातालाई प्रभावित र अन्यौलमा पार्न सक्ने सम्भावना देखिँदैछ । पार्टीप्रति नकारात्मक धारणा बनाउने खालका अनेकन भ्रम/मिथ्या सूचना फैलाउने प्रयास भइरहेको छ । अरुलाई गाली नगरी आफ्ना एजेण्डा राख्ने बेला हो यो । त्यसतर्फ सचेत हुन जरुरी छ । पार्टीका नेता तथा कार्यकता आफ्नै वडा/क्षेत्रमा रहेर अझै क्रियाशील हुनुपर्ने आवश्यकता देखिन्छ । काँग्रसले पछिल्लो पटक लिएको नीति र प्रतिज्ञालाई आम मतदाताकै माझ गएर बुझाउनुपर्नेछ ।
काँग्रेसका उम्मेदवारलाई नै किन जिताउने ?
देश संवैधानिक संकटको अवस्थामा छ, यो निर्वाचन विगत जस्तो नियमित र सामान्य अवस्थामा जस्तो नभएकाले सबै दल निर्वाचनमा होमिएका छन् । लोकतन्त्रको सुदृढीकरण, संविधानको रक्षा र विकासका लागि पनि काँग्रेसले जित्न अनिवार्य छ । संविधान पीता सुशील कोइरालाले बाँकेमा शुरु गर्नुभएको विकासको अभियानलाई निरन्तरता दिन, सद्भाव कायम राख्न, स्थानीय मुद्दालाई माथिल्लो तहसम्म पु¥याउन र सम्वोधन गर्न पनि काँग्रेसका उम्मेदवारलाई जिताउन जरुरी छ । काँग्रेसले नै सरकारको नेतृत्व गर्न सक्ने सम्भावना रहेकाले पनि काँग्रेसकै उम्मेदवारलाई विजयी गराउनुपर्ने आवश्यकता छ । तसर्थ मतदाता अन्यौल हुन पर्दैन ।
कांग्रेसको मुख्य चुनावी एजेन्डा र प्रतिबद्धता के–के हुन् ?
काँग्रेसले नीति र नेतृत्व परिवर्तन गरेपछि भिजन १० सहित नयाँ एजेण्डा ल्याएको अवगतै छ । भ्रष्टाचारको अन्त्य, सुशासन स्थापनाको अगुवाई गर्ने तयारी पार्टीले गरेको छ । पार्टीको तल्लो तहमा पनि त्यो सन्देश छ ।
काँग्रेसका उम्मेदवारले राप्ती नदीको डुवान/कटानको समस्या समाधान, नेपालगञ्जमा रिङ रोड, बाँके निकुञ्ज वरिपरिका वस्ती व्यवस्थापन, नौवस्ता औद्योगिक क्षेत्र व्यवस्थापन, भौतिक पूर्वाधार निर्माण लगायत निजी क्षेत्रसँगको सहकार्यलाई प्राथमिकता दिएका छन् । स्थानीय मुद्दाको उठान र सम्वोधनका लागि पनि काँग्रेसका उम्मेदवार जिताउन जरुरी छ ।
पार्टीभित्रको गुटबन्दीले निर्वाचनमा असर पार्न सक्छ भन्ने चिन्ता छ । त्यस्तो केही पाउनुभएको छ ?
समग्रमा पार्टी एक ढिक्का देखिन्छ । यसपाली पार्टीमा अन्तरविरोध छैन । आन्तरिक एकता छ । विगत जस्तो गुटगत राजनीति छैन । सबैको चित्त नबुझेको हुन सक्छ तर त्यसले मतलाई नै प्रभावित पार्छ भन्ने लाग्दैन । काँग्रेसीजन एकमत छन् ।
मतदातालाई के भन्नुहन्छ ?
यो निर्वाचन सामान्य निर्वाचन होइन । आम मतदाताले त्यो बुझेको हुनुपर्छ । राजनीतिक पृष्ठभूमि नभएका व्यक्ति पनि उम्मेदवार छन् । सोही अनुसार मत पनि मागिरहेका छन् । रहर र लहडका भरमा मत दिने अवस्था छैन । संयमित, लोकतान्त्रिक र सुधारिएको र सबै दलको पनि नेतृत्व गर्न सक्ने दल काँग्रेस नै भएकाले काँग्रेसको उम्मेदवारलाई नै मत हाल्नका लागि हार्दिक अपील गर्दछु ।
संकटमा परेको देशलाई जोगाउन सक्ने र उभो लगाउन सक्ने क्षमता काँग्रेसमै छ । विगतमा पनि अप्ठ्यारोमा परेका बेला काँग्रेसले नै नेतृत्व गरेकाले यसपाली पनि काँग्रेसका उम्मेदावरलाई नै जिताउन अपील गर्दछु ।
