नेपालगन्ज, फागुन १३ । खेलाडी र खेल क्षेत्रको मनोबल बढाउने योजनासहित काम गर्ने नेपाली कांग्रेसको तर्फबाट बाँके क्षेत्र नम्बर ३ का उम्मेदवार एवम् लुम्बिनी प्रदेशका सभापति अमर सिंह पुनले बताएका छन् । आसन्न प्रतिनिधि सभा निर्वाचनमा बाँके क्षेत्र नम्बर ३ बाट उम्मेदवारी दिएका पुनले बाँके क्षेत्र नम्बर ३ लाई खेलकुदको क्षेत्रको रुपमा परिचित गराउन पहल गर्ने बताए ।
बाँके क्षेत्र नम्बर ३ का खेलाडीले राष्ट्रियदेखि अन्तर्राष्ट्रिय स्तरका प्रतियोगितामा महत्वपूर्ण सफलता हासिल गरेको बताउँदै पुनले खेलकुदका भौतिक पूर्वाधारसँगै खेलाडीलाई प्रोत्साह गर्न आफू प्रतिवद्ध रहेको जानकारी गराए । उनले भने,‘खेलकुद क्षेत्रको समग्र विकास गर्ने कुरामा हामी स्पष्ट छौं ।
यस क्षेत्रमा क्रिकेटदेखि अन्य खेलका भौतिक पूर्वाधार विकास गर्न आवश्यक छ । खेलकुद क्षेत्रमा भएका अधुरा काम सम्पन्न गर्दै राष्ट्रियदेखि अन्तर्राष्ट्रिय प्रतियोगिता आयोजनालाई प्राथमिकता दिन जरुरी छ ।’ युवा तथा खेलकुदको विकासको बारेमा प्रतिज्ञा-पत्रमार्फत पनि प्रतिवद्धता जनाएको पुनले बताए ।
पुनले सार्वजनिक गरेको प्रतिज्ञा-पत्रमा खजुरा गाउँपालिकास्थित शुक्र रंगशाला, शुक्र भलिबल रंगशाला, डि-गाउँस्थित मिनी रंगशाला, सैनिकको मैटहवा माविको खेल मैदान, खजुरा ब्याड्मिन्टनको स्तरोन्नति गर्ने उल्लेख गरिएको छ ।
विभिन्न स्थानीय, राष्ट्रिय खेलकुद प्रतियोगिताको प्रवद्र्धन गर्दै स्थानीय, राष्ट्रिय तथा अन्तर्राष्ट्रिय खेलाडी, प्रशिक्षकलाई प्रोत्साह गर्ने, एक टोल एक खेल मैदान र पार्क निर्माणमा अग्रसरता दिने, क्षेत्रको उपयुक्त स्थानमा राष्ट्रिय स्तरको रंगशाला निर्माणमा पहल गर्ने, नवप्रतिभा, नवप्रवर्तन र सीप र प्रविधिलाई प्रोत्साहन गर्ने पुनले बताए ।
बाँके क्षेत्र नम्बर ३ बाट नेपाली फुटबल टोली तथा नेपाल पुलिस क्लबको महिला टोलीको कप्तान निरु थापा, राष्ट्रिय पुरुष फुटबल टिमबाट बिक्रम सिंह ठकुरीले खेलिसकेका छन् । त्यस्तै मार्सल आर्टसका विभिन्न खेलबाट पनि यस क्षेत्रका खेलाडीले अन्तराष्ट्रिय स्तरको प्रतियोगितामा भाग लिएका छन् ।
खेलकुदको माध्यमबाट बाँके क्षेत्र नम्बर ३ लाई चिनाउन योगदान गर्ने खेलाडी र खेलकर्मीलाई राज्यले प्रोत्साहन गर्ने वातावरणको निर्माण गरिने पर्ने पुनले बताए ।
