नेपालगन्ज, फागुन ९ । नेपाली काँग्रेसबाट बाँके क्षेत्र नम्बर २ का उम्मेदवार शुधान्सु कोइरालाले जेनजी युवाहरुको भावना अनुसार चल्ने बताएका छन् ।
शनिबार बिहान नेपालगन्ज उपमहानगरपालिका वडा नम्बर २० का राँझा, नयाँ बस्ती, थपुवाका मतदातासंगको भेटमा कोइरालाले युवाहरुको भावना अनुसार सबैभन्दा पहिला आफू बदलिनुपर्छ भनेर नेपाली काँग्रेस बदलिएर आएको स्पष्ट पारे ।
कोइरालाले भने, ‘जेनजी युवाहरुको भावना अनुसार पार्टी पनि बदलिन जरुरी देखेरे नै नेपाली काँग्रेसभित्र पनि परिवर्तन भएको छ । हामी शहादत प्राप्त गरेका युवाहरुको सम्मान गछौं, जसले देशमा युवाको भावना अनुसार अगाडि बढ्नुपर्छ भन्ने सन्देश प्रवाह गरेको छ ।’
प्रतिनिधि सभा सदस्यको हैसियतले सधैं भ्रष्टाचारको बिरुद्ध र सुशासनको पक्षमा आफ्नो आवाज बुलन्द रहने कोइरालाले उल्लेख गरे ।
‘देशमा एकदमै आवश्यक भनेको भ्रष्टाचार नियन्त्रण रहेको छ, त्यस कारण मेरो आवाज भ्रष्टाचारको बिरुद्धमा सदैब रहनेछ र म तपाईंहरुको छोरा-भाइ-भतिज-दाई भएको नाताले एक रुपैयाँ पनि भ्रष्टाचार गर्नेछैन,’ कोइरालाले भने । कोइरालाले नेपाली युवाको बिदेशिने बाध्यता अन्त्यका लागि आफ्नो प्राथमिकता रहने बताए । उम्मेदवार कोइरालाले त्यसक्रममा घरदैलो समेत गरेका थिए ।
सो क्रममा मतदाताले कोइराला नयाँ उम्मेदवार र केही गर्न चाहने देखिएको हुँदा आफुहरुले सहयोग गर्ने प्रतिबद्धता जनाएका थिए । साथै उनीहरुले आफ्नो क्षेत्रको समस्या समाधानका लागि आवश्यक कार्यहरु गर्नुपर्ने कोइरालालाई सुझाएका थिए ।
थपुवाका महेन्द्र जोशी, टंक बहादुर शाही, राँझा टोलका सन्ताृेष कुमार शर्माले कांग्रेसले युवा र स्वच्छ छविको ब्यक्तिलाई उम्मेदवार बनाएकाले कांग्रेसको रुख चुनाव चिन्हमा मतदान गर्न आफूहरु आतुर रहेको बताए । कांग्रेस बदलिएर आएकाले कांग्रेसले जनतामा आशा जगाएको उनीहरुको भनाई छ ।
