कोहलपुर फागुन ६ । चुनावी माहोल तात्दै जाँदा शिक्षासँग जोडिएका मुद्दालाई केन्द्रमा राख्दै बाँके क्षेत्र नं. १ का प्रतिनिधिसभा सदस्य पदका उम्मेदवार नारायण प्रसाद गौडेलले शिक्षकका मागहरुलाई कानुनी रुपमै सम्वोधन गर्ने प्रतिबद्धता व्यक्त गरेका छन् ।
राप्तीसोनारी गाउँपालिका–५ मा आयोजित नेपाल शिक्षक संघ राप्तीसोनारीको आठौं स्थानीय प्रतिनिधिसभालाई सम्वोधन गर्दै गौडेलले शिक्षक समुदायसँग प्रत्यक्ष संवादमार्फत समस्या समाधान गर्ने नीति आफूहरुको रहेको बताए । ‘शिक्षकका मागहरु केवल आश्वासनले होइन, कानून बनाएरै सम्वोधन गरिन्छ उनले भने–‘समस्या बुझ्न शिक्षकसँगै बसेर समाधान खोज्नु पर्छ, त्यो हाम्रो प्राथमिकता हो ।’
उनले संसदमा बिचाराधीन शिक्षा ऐन पारित गराउन नेपाली कांग्रेसकै नेतृत्वमा सम्भव हुने दाबी गरे । शिक्षा क्षेत्रको दीर्घकालीन सुधारका लागि उक्त ऐन अपरिहार्य रहेको बताउँदै उनले कांग्रेसलाई जिताउन मतदातासँग आग्रह गरे । ‘कांग्रेस बदलिएर आएको छ, देश बदल्ने संकल्पका साथ अघि बढेको छ भन्ने कुरा आम नागरिकसम्म पुर्याउनु आवश्यक छ’ उनले भने ।
गौडेलले शिक्षक संघलाई पनि वर्तमान परिस्थितिबारे आम नागरिकलाई सचेत बनाउन सक्रिय भूमिका खेल्न आग्रह गरे । उनले पार्टीका नेता–कार्यकर्ता र समर्थकहरुलाई एकढिक्का भएर चुनावी अभियानमा जुट्न आह्वान गर्दै मतदातालाई ‘मुख हेरेर होइन, रुख हेरेर भोट हाल्नुहोस्’भन्ने सन्देश घरघरमा पुर्याउन आग्रह गरे ।
शिक्षक संघ राप्तीसोनारीका अध्यक्ष दलबहादुर ओलीको अध्यक्षता तथा राप्तीसोनारी गाउँपालिकाका कार्यबाहक अध्यक्ष मनिषा सिंह थारुको प्रमुख आतिथ्यतामा कार्यक्र
म भएको थियो ।
कार्यक्रममा कोहलपुर नगरपालिकाका नगर प्रमुख पूर्ण प्रसाद आचार्य, राप्तीसोनारी गाउँपालिकाका निवर्तमान अध्यक्ष लाहुराम थारु, नेपाली कांग्रेसका क्षेत्रीय सभापति पोषण केसी, निवर्तमान सभापति माधवराम खत्री, महासमिति सदस्य महावीर ओली, नेपाल शिक्षक संघका केन्द्रीय सदस्य पवन यादव, लुम्बिनी प्रदेश सल्लाहकार दोर्ण ओली लगायतले पनि आफ्नो धारणा राखेको नेपाल शिक्षक संघ राप्तीसोनारीका सचिव खडानन्द डाँगीले जानकारी दिए ।
