नेपलागञ्ज, २४ कात्तिक । नेपाल किसान महासंघका केन्द्रिय अध्यक्ष गणेशचन्द्र तिमिल्सिनाले किसानका आवाज बुलन्द पार्ने अभियानमा महासंघ रहेको प्रष्ट पार्नुभएको छ । ‘हामी अहिले सोही प्रयोजनका लागि देश दौडाहामा रहेका छौ’,अध्यक्ष तिमिल्सिनाले बताउनुभयो ।
आज नेपालगञ्जमा भएको पत्रकार भेटघाटमा उहाँले महासंघले अगाडि सारेका मुद्दालाई सबै जिल्लामा पुर्याउने दाबी समेत गर्नुभयो । ‘हाम्रो मुद्दालाई हामी जिल्ला(जिल्लामा लिएर जान्छौं, किसानमा केही न केही परिवर्तन आउनुपर्छ,’ अध्यक्ष तिमिल्सिनाले भन्नुभयो, ‘किसानलाई हामी आधुनिक प्रविधिसँग जोडेर व्यवसायमुखी बनाउन चाहन्छौं ।’
महासंघले समयमै धान खरिद गर्न खाद्य ब्यवस्था तथा ब्यापार कम्पनी लिमिटेडलाई दवाव सिर्जना गर्दै आएको र उखु, दुध र स्याउ उत्पादक किसानको बाँकी बक्यौता भुक्तानी गराउन पनि सरकार लगायतका निकायसँग आवश्यक समन्वय गरेको अध्यक्ष तिमिल्सेनाको भनाई छ । किसानलाई रासायनिक मल वितरण कार्यलाई प्रभावकारी बनाउन महासंघले सरकारलाई पटक पटक ध्यानाकर्षण गराइरहेको बताउनुभयो ।
‘‘रासायनिक मल बिक्री, वितरण गर्ने जिम्मा सहकारी संस्थालाई दिँदा कतै राम्रो भएको छ, कतिपय ठाउँमा बिकृति पनि निम्तिएको छ, किसानले सहकारीको विकल्पमा सिधै मल खरिद गर्न पाउनुपर्छ ।’ नेपाल भारत खुला सीमाका कारण नेपाली किसानले उत्पादन गर्ने बस्तुलाई भारतीय उत्पादनले बिस्थापित गर्ने गरेको उनको भनाई छ ।
मुलुकको बृहत्तर विकासका लागि कृषि, पर्यटन र जलस्रोतलाई प्राथमिकता दिनुपर्नेमा उनको जोड छ । कृषि, पर्यटन र जलस्रोतलाई एकैसाथ लिएर जानुपर्छ । त्यसो गर्न सकिएन भने मुलुकको बृहत् विकास सम्भव छैन, उहाँले भन्नुभयो ।
