नेपालगञ्ज, २७ भदौ । ‘राष्ट्र जोगाऔं र संविधान जोगाऔं’ नाराका साथ आज नेपालगञ्जमा पत्रकार र अधिकारकर्मीहरुले एकैठाँउमा मौन प्रदर्शन गरेका छन् । नेपाल पत्रकार महासंघ, बाँकेको कार्यालय अगाडी पत्रकार र अधिकारकर्मीहरुले यस्तो प्रदर्शन गरेका हुन् ।
नेपाल पत्रकार महासंघ बाँके र नेपाल बार एसोसिएसनको अगुवाई एवम् शान्ति र लोकतन्त्रका लागि पेशागत संगठन (पापड) को आयोजनामा गरिएको मौन प्रदर्शनमा नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईं, बाँके जिल्ला अदालत बार एसोसिएसनका अध्यक्ष मेहरसिंह खत्री, प्याव्सन बाँकेका अध्यक्ष विकास बज्राचार्य, प्राध्यापक संघका अध्यक्ष राजेन्द्रकुमार श्रेष्ठ, नेपाल शिक्षक महासंघ बाँकेका उपाध्यक्ष शेखर रावत, नेपाल चिकित्सक संघका सदस्य डा राहुल कुर्मी, वरिष्ठ अधिवक्ता विजय गुप्तालगायतको सहभागिता रहेको थियो ।
महासंघको केन्द्रीय सर्कुलर अनुसार संविधानको रक्षाका लागि मौन प्रदर्शन महासंघ बाँकेका अध्यक्ष नवीन गिरीले बताउनुभयो ।
यसैबीच, महासंघकै कार्यालयमा आज आयोजित कार्यक्रममा प्रेस स्वतन्त्रता सेनानी एवम् नेपाल पत्रकार महासंघ बाँकेका पूर्व सभापति स्वर्गीय पन्नालाल गुप्ताप्रति भावपूर्ण श्रद्धासुमन अर्पण गरिएको छ । स्वर्गीय गुप्ताको ९७औं जन्मजयन्तीका अवसरमा स्वर्गीय गुप्ताप्रति सहभागिहरुले फुलमालासहित एक मिनेट मौनधारण गरेर भावपूर्ण श्रद्धाञ्जली अर्पण गरेका थिए ।
वि.संं. १९८६ भदौ २७ गते जन्मिनु भएका गुप्ताको विसं २०७६ माघ १५ गते निधन भएको थियो । किरण साप्ताहिकका प्रधान सम्पादक गुप्ता जीवनको अन्तिम कालसम्म पनि पत्रकारितामा क्रियाशील हुनुहुन्थ्यो ।
यसैगरी, स्वर्गीय गुप्ताको जन्मजयन्तीका अवसरमा नेपालगञ्जस्थित मानव सेवा आश्रममा आश्रित ब्यक्तिहरुलाई खाना खुवाइएको छ । पन्नालाल गुप्ता प्रतिष्ठानले खाना खुवाएको हो ।
त्यसक्रममा प्रतिष्ठानका अध्यक्ष एवम् गुप्ता पुत्र बरिष्ठ अधिबक्ता विजयकुमार गुप्ता, नेपाल पत्रकार महासंघ बाँकेका अध्यक्ष नवीन गिरी, नेपाल प्रेस युनियन बाँकेका अध्यक्ष प्रियास्मृति ढकाललगायत गुप्ता परिवारको उपस्थिति थियो ।
स्वर्गीय गुप्ता नेपाल प्रेस युनियन बाँकेका संस्थापक अध्यक्ष समेत हुन् ।
