नेपालगञ्ज, १४ साउन । नेपालगञ्जमा आज मानव अधिकार र सञ्चारु विषयक अन्तरक्रिया कार्यक्रम गरिएको छ । नेपाल पत्रकार महासंघ बाँके शाखा र अनौपचारिक क्षेत्र सेवा केन्द्र (इन्सेक) लुम्बिनी प्रदेश कार्यालय नेपालगञ्जको संयुक्त आयोजनामा अन्तरक्रिया कार्यक्रम गरिएको हो ।
अन्तरक्रिया कार्यक्रमका वक्ताहरुले मानव अधिकारको अभ्यास, संरक्षण र प्रवद्र्धनमा सञ्चारको महत्वपूर्ण भूमिका हुने भन्दै सञ्चार संस्थाहरु स्वतन्त्र भए मात्र मानवअधिकार बलियो हुदै जाने धारणा साँझा राखेका थिए । सहभागि वक्ताहरुले मानवअधिकारको संरक्षणमा स्वतन्त्र प्रेस अनिवार्य शर्तका रुपमा हुनुपर्ने बताउदै लोकतन्त्र र मानव अधिकारको दिगो संरक्षणका लागि अधिकारकर्मी र पत्रकारजगतको साँझा कार्यक्रम तयार गर्नुपर्नेमा जोड समेत दिएका छन् ।
नेपाल पत्रकार महासंघ, बाँकेका अध्यक्ष नवीन गिरीको अध्यक्षतामा भएको कार्यक्रममा प्रमुख अतिथि नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाईले नागरिक अगुवा संगठनहरु सहकार्य र समन्वय गरेर अघि बढ्न आवश्यक रहेको चर्चा गर्दै संगठित ढंगले अघि बढे सञ्चार र मानव अधिकारको अवस्थालाई प्रवद्र्धन गर्न टेवा पुग्ने बताउनुभयो ।
बरिष्ठ अधिवक्ता सुनिल श्रेष्ठले अब संगठित ढंगले अघि बढ्न जरुरी रहेको बताउँदै सञ्चार र मानव अधिकारबीच गहिरो सम्बन्ध रहेको छ भन्नुभयो ।
कार्यक्रममा राष्ट्रिय मानव अधिकार आयोग नेपालगञ्ज कार्यालयका मानव अधिकार अधिकृत दयाराम पाठक, नागरिक समाजका संयोजक कृष्णप्रसाद श्रेष्ठ, अधिबक्ताहरु विकास आचार्य, बसन्त गौतम, बीरबहादुर ओली, अधिकारकर्मीहरु प्रकाश उपाध्याय, कमला पन्त, केशव कोइराला, प्रभातसिंह ठकुरी, केशव नेपाली, पत्रकारहरु प्रेम केसी, निरज गौतम, नरेन्द्रजंग पिटर, मोहम्मद आरिफ अन्सारी, विरेन्द्र जैसी, साहिदा साहलगायतले बोल्नुभएको थियो ।
त्यस अवसरमा इन्सेकले सन् २०२५ जनवरीदेखि जुनसम्मको अवधिमा मानव अधिकारको अवस्था चित्रित तथ्यांकीय विवरण पनि उपलब्ध गराएको थियो ।
