बर्दिया, २ असार । ग्रीन परियोजना अन्तर्गत बर्दिया ठाकुरबाबाका १६ जना किशोरी तथा युवतीहरुलाई स्थनीय जातको कुखुरा पालनका लागि सहयोग सामग्री उपलव्ध गराइएको छ । प्लान इन्टरनेशनल नेपालको सहयोगमा बाँके युनेस्को क्लबले बर्दियामा साढे एक वर्षदेखि ग्रीन परियोजना कार्यक्रम सञ्चालन गर्दै आएको छ । क्लबका अध्यक्ष रबि तुलाधरका अनुसार परियोजनाको अवधि तीन वर्षको रहेको छ ।
आज ठाकुरबाबा नगरपालिका वडा नं. ९ कुशलपटवामा आयोजित कार्यक्रममा सोही परियोजना अन्तर्गत १८ वर्षदेखि २४ वर्ष उमेरका १६ जना किशोरी तथा युवतीहरुलाई स्थानीय जातका कुखुरा पालनका लागि कुखुराको चल्ला, फिडर, ड्रिंङ्गकर, डिजिटल तौल मेसिन, एप्रोन, पँजा, दाना, ब्रुडर, कुखुरे जाली, जस्तापाता, थर्मामिटर, त्रिपाल, गम्बुट, चुनालगायतका सामग्री निशुल्क उपलव्ध गराइएको हो । कार्यक्रम अधिकृत राधेकृष्ण थारुका अनुसार, किशोरी तथा युवतीलाई जनही करिब रु २४ हजार मूल्य बराबरका सामग्री उपलव्ध गराइको छ ।
उक्त सामग्री दिनुपूर्व कार्यक्रममा सहभागि ठाकुरबाबा नगरपालिका वडा नं. १ देखि ५ सम्मका ती किशोरी र युवतीलाई ३९० घण्टाको विषयगत तथा सञ्चार प्रविधि सम्बन्धि तालिम उपलव्ध गराइएको थियो ।
सामग्री हस्तान्तरण कार्यक्रममा ठाकुरबाबा नगरपालिका वडा नं. ४ का अध्यक्ष अमिन थारु, वडा नं. २ का अध्यक्ष कमलप्रसाद चपाई, क्लबका प्रमुख संरक्षक प्रवेजअलि सिद्धिकी, अध्यक्ष रबि तुलाधरलगायतले किशोरी तथा युवतीहरुलाई सामग्री प्रदान गर्नुभएको थियो ।
त्यस अवसरमा वडा अध्यक्षद्धय थारु र चपाईले बाँके युनेस्को क्लबले किशोरी र युवतीलाई परियोजना कार्यक्रममा समेटेर महिला सशक्तिकरणमा अर्को एउटा ईटा थपेको छ भन्नुभयो । क्लबका अध्यक्ष तुलाधरको अध्यक्षतामा भएको सामग्री हस्तान्तरण कार्यक्रममा क्लबका सल्लाहकाद्धय नीरज गौतम र कमल पन्थी, फिल्ड सुपरभाइजर कञ्चन दहित, नागरिक समाजका अगुवा तथा स्थानीयहरुको उपस्थिति रहेको थियो ।
