नेपालगञ्ज, २३ चैत । नेपालगञ्जस्थित सोल्टी होटलले सांगितिक कार्यक्रमसहित नेपाली नयाँ वर्ष २०८१ विशेष कार्यक्रम गर्ने भएको छ ।
चैत महिनाको अन्तिम दिन ३० गते साँझ ६ बजेदेखि राति १२ बजेसम्म आयोजना हुने सांगितिक कार्यक्रममा नेपाली सांगितिक जगतका ख्यातिप्रांप्त स्रष्टा गायक कालिप्रसाद बास्कोटाको प्रस्तुती रहने सोल्टी वेस्टेण्ड प्रिमियम नेपालगञ्जका जनरल म्यानेजर राजविक्रम शाहले जानकारी दिनुभयो ।
नयाँ वर्षको कार्यक्रम बारे जानकारी दिने उद्देश्यले आज सोल्टी होटलमा आयोजना गरिएको पत्रकार भेटघाटमा जनरल म्यानेजर शाहले भन्नुभयो—‘गायक बास्कोटासंगै साथीभाई टीम र वुटबलको ब्याण्डका साथै गेट—टुगेदरको आकर्षक व्यवस्था गरिएको छ ।’
सोल्टीको नयाँ वर्ष कार्यक्रका लागि रु दुई हजार ५०० र रु तीन हजारको टिकटको व्यवस्था गरिएको छ । १० वर्ष मुनिकालाई निशुल्क प्रवेश दिइनेछ । कार्यक्रमको एकदिन अघिसम्म रु दुई हजार ५०० र कार्यक्रमकै दिन रु तीन हजारमा प्रवेश टिकट पाउने बताइएको छ । उक्त टिकटमा एउटा क्यान बियर उपलव्ध गराइने छ ।
नयाँ वर्ष कार्यक्रममा राजपरिवारका सदस्यहरुको पनि सहभागिता रहने जनरल म्यानेजर शाहले जानकारी दिनुभयो । उहाँका अनुसार, पश्चिम क्षेत्रको भ्रमणमा रहनु भएका पूर्व राजा ज्ञानेन्द्र शाह र रानी कोमलको टुर मुकाम नेपालगञ्ज नै भएकाले सोल्टी होटलको नयाँ वर्ष कार्यक्रममा उहाँहरुलाई सहभागि हुन आग्रह गरिएको छ ।
नयाँ वर्षको कार्यक्रममा सहभागिहरुका लागि आकर्षक पुरस्कार, आतिशबाजी, लाइभ बार एण्ड फुड काउण्टरको व्यवस्था गरिएको होटल सोल्टीले जनाएको छ ।
