देशभरका २५ जिल्लामा मतदान विथोलियो, ३५ राउण्ड फायर

नेपालगञ्ज, ४ मंसिर । प्रतिनिधिसभा र प्रदेससभा निर्वाचनमा देशभरका २५ जिल्लाका ४४ वटा मतदान केन्द्र विथोलिएको छ । विथोलिएका मध्ये ३२ केन्द्रमा पुनः मतदान शुरु भइसकेको छ भने १२ केन्द्रको मतदान पुनः शुरु गर्न छलफल भइरहेको नेपाल प्रहरीले जनाएको छ । विथोलिएका मतदान केन्द्रमा विभिन्न विषयमा विवाद तथा झडप भएको थियो ।
मतदान केन्द्रमा भएको विवाद र झडप नियन्त्रणमा लिन प्रहरीले १५ ठाउँमा ३५ राउण्ड गोली चलाएको थियो । प्रहरीका अनुसार, अहिले स्थिति नियन्त्रणमा आइसकेको छ । रौतहट, सिराहा, चितवन, दोलखा, बाजुरा, हुम्ला लगायत जिल्लामा हवाई फायर भएको जनाइएको छ ।
यस्तै, बर्दिया गुलरियाको एक मतदान केन्द्र नजिक बम विस्फोट भएको छ । बम विस्फोट भएपछि मतदान रोकिएको छ । गुलरिया वडा नम्बर २ स्थित शम्भुशरण माध्यमिक विद्यालय नजिक बम विस्फोट भएपछि मतदान रोकिएको प्रहरीले जानकारी दिएको छ ।