बर्दियाका १२० युवा उमेर समूहका महिलाले एकैसाथ रोजगार पाउने

नेपालगञ्ज, ९ भदौ । बर्दियाका अति विपन्न तथा जोखिममा रहेका १२० जना युवा उमेर समूहका महिलाहरुले एकैसाथ रोजगारी र स्वरोजगारी पाउने भएका छन् । उद्यमशिलतामार्फत महिलाहरुको आर्थिक सशक्तिकरण, स्वरोजगार सृजना तथा जीवीकोपार्जनमा पहुँच र रोजगार प्रवद्र्धन परियोजना कार्यक्रम अन्तर्गत उनीहरुले रोजगारी र स्वरोजगारी पाउन लागेका हुन् ।
प्लान नेपालको सहयोगमा बाँके युनेस्को क्लबले बर्दियामा उक्त परियोजना संचालन गर्दै आएको छ । परियोजना अन्तर्गत सहभागि हुन चाहने युवा महिलाको छनोट गरी विभिन्न चरणमा तालिम दिने कार्यक्रम क्लबले अहिले संचालन गर्दै आएको छ । क्लबका अध्यक्ष रबी तुलाधरका अनुसार, १८ देखि २४ वर्षका १२० युवा महिलालाई स्वरोजगार बनाउने परियोजनाको लक्ष्य रहेको छ । सोही लक्ष्यलाई भेटाउन बर्दियाको गुलरियामा क्लबले युवा महिलालाई सीप विकास तथा उद्यमशिलता तालिममा सहभागि बनाएको छ ।
‘परियोजना अन्तर्गत बर्दियाको गुलरिया र ठाकुरबाबा नगरपालिकाका १२० अति विपन्न तथा जोखिममा रहेका युवा महिलालाई सीपमूलक तालिम दिएर विभिन्न चरणपछि ६० जनालाई व्यवसाय गर्न लगाउने र ६० जनालाई रोजगारीको अवसर प्रदान गरिनेछ’—क्लबका प्रमुख संरक्षक प्रवेजअलि सिद्धिकीको भनाइ छ ।
बुधवारदेखि शुरु भएको चार दिने तालिममा व्यवसाय छनोट, सञ्चालनका आधारहरु, व्यवसायीक योजना निर्माण र व्यवस्थापनका विभिन्न पक्षको ज्ञान दिइने प्रशिक्षक डिलाप्रसाद ओलीले बताउनुभयो ।