नेपालगञ्ज, १९ असार । नेपाल पत्रकार महासंघ लुम्बिनी प्रदेश सशक्तिकरण तथा क्षमता अभिवृद्धि कार्यक्रम अन्तर्गत बाँकेको कोहलपुरमा आज मिडिया साक्षरता अन्तरक्रिया कार्यक्रम आयोजना गरिएको छ । कार्यक्रममा बाँके, बर्दिया र दाङ्गका ४० भन्दा बढी पत्रकारहरुको सहभागिता रहेको छ । कार्यक्रम भोलिसम्म संचालन हुने जनाइएको छ ।
अन्तरक्रिया उदघाटन समारोहमा नेपाल पत्रकार महासंघका पूर्व केन्द्रीय अध्यक्ष गोविन्द आचार्य पत्रकारका लागि अहिलेको समय व्यवसायिक ज्ञानका साथै प्रविधिको जानकारी हुनु पनि त्यत्तिकै जरुरी छ भन्नुभयो । अन्तरक्रियामा सहभागिहरुलाई पूर्व अध्यक्ष आचार्यले नै सहजीकरण गरिरहनु भएको छ । कार्यक्रममा कोहलपुर नगरपालिकाका मेयर पूर्णप्रसाद आचार्यले मिडियालाई सबैको साझा बनाउनुपर्नेमा जोड दिनुभयो । महासंघ लुम्बिनी प्रदेशका उपाध्यक्ष शुक्रऋषि चौलागाईको अध्यक्षतामा भएको कार्यक्रममा कोहलपुरका उपमेयर संगीता सुवेदी, पत्रकार महासंघ, बाँकेका कार्यवाहक अध्यक्ष करुणा शाहलगायतले बोल्नु भएको थियो ।
