स्तरोन्नतिको पर्खाईमा नेपालगन्ज औद्योगिक क्षेत्र

नेपालगन्ज, ७ असार । बाँकेमा लगानीकर्ता भित्र¥याउन नेपालगन्ज औद्योगिक क्षेत्रका सामु थुप्रैखाले चुनौती देखिएको छ । विक्रम सम्वत् २०३० सालमा स्थापना गरिएको नेपालगन्ज औद्योगिक क्षेत्रले आफ्नो अधिनमा रहेको जग्गा उद्योग सञ्चालनका लागि विक्रम सम्बत् २०७१ सम्म २० वर्ष र २०७२ देखि ४० वर्षका लागि लिजमा दिँदै आएको छ ।
औद्योगिक क्षेत्रमा अहिले ख्याती कमाएका लक्ष्मी प्लास्टिक, टण्डन प्लास्टिक, शिखर प्लाई, विनोद मेटल, विजय मेटल, बिमल मेटल, विनायक मेट, आर्शिवाद पेन्टलगायत सानाठूला गरी ३४ उद्योग सञ्चालनमा छन् । तर, वर्षौंदेखि औद्योगिक क्षेत्रको स्तरोन्नति नहुँदा सोचेजस्तो प्रतिफल प्राप्त गर्न नसकेको उद्योगीको भनाइ छ । जसका लागि लगानीकर्ता भित्रिने सम्भावना पनि चुनौतिपूर्ण बन्दै गएको नेपालगन्ज उद्योग बाणिज्य संघको ठम्याई छ ।
यो औद्योगिक क्षेत्र बाहेक बाँकेको बैजनाथ गाउँपालिकामा प्रदेशस्तरको नौवस्ता औद्योगिक क्षेत्र निर्माणको चरणमा छ । औद्योगिक क्षेत्र निर्माणको क्रम शुरु भए पनि लगानीकर्ता भित्र¥याउने खासै कुनै रणनीतिक योजना भने नभएको संघका अध्यक्ष अव्दुलवाहिद मन्सुरीको भनाइ छ । औद्योगिक क्षेत्रको पूर्वाधार निर्माणका लागि राज्यले ठूलो धनराशी खर्चिन गइरहेका बेला पूर्वाधार सम्पन्न भइसकेपछि उद्योगको उपस्थितका लागि अहिलेसम्म कुनै प्रयास समेत नभएको उहाँको बुझाई छ । सुदुरपश्चिम प्रदेश, कर्णाली प्रदेश र लुम्बिनी प्रदेशको आर्थिक राजधानी बनाउने कसरतमा जुटेको सरकारको लगानीकर्ता भित्र¥याउना औद्योगिक क्षेत्रले महत्वपूर्ण भूमिका खेल्न सक्ने निजीक्षेत्रले अपेक्षा राखेको छ । तर लगानीकर्ता आर्कषित गर्ने चुनौती भने यथावतै रहेको छ ।
नेपालगन्ज औद्योगिक क्षेत्र व्यवस्था कार्यालयका प्रमुख कृष्णबहादुर पुनका अनुसार, संघीय सरकारले बैजनाथमा रु ८ अर्ब ७७ करोडको लगानीमा औद्योगिक क्षेत्र प्रस्ताव गरेको हो । निर्माणाधीन सो औद्योगिक क्षेत्रमा २७० बिगाह क्षेत्रफल छ । कूल ३३८ विगाह जग्गा मध्ये प्रहरी, सुकुम्वासी र अन्य प्रयोजनका लागि छुट्याएर सरदर २७० विगाह औद्योगिक क्षेत्रका लागि जोगिने प्रमुख पुनले बताउनु भयो । सो औद्योगिक क्षेत्र निर्माणका लागि जग्गा अधिग्रहण र डिपीआरको काम सम्पन्न हुनुका साथै वातावरण प्रभाव मूल्यांकनको प्रतिवेदन पनि बन तथा वातावरण मन्त्रालयवाट स्विकृत भइसकेको छ ।
नौवस्ता औद्योगिक क्षेत्रमा उद्योग स्थापना गर्न चाहने यस क्षेत्रका उद्योगीहरुसंग नेपालगन्ज औद्योगिक क्षेत्र व्यवस्था कार्यालयले आशयपत्र माग गरेकोमा अहिलेसम्म झण्डै २०० बढी आशयपत्र समेत प्राप्त भएको छ । नेपाल सरकारको योजना अनुसार, नौवस्तामा स्थापना हुने औद्योगिक क्षेत्रमा प्रत्यक्ष रोजगारको अवस्था सिर्जना हुने कम्तीमा २०० ठूला र मझौला उद्योग स्थापना गर्न सकिने पुनले बताउनु । उहाँका अनुसार, सो औद्योगिक क्षेत्रमा उद्योग स्थापना गर्न चाहने उद्योगीहरुका लागि कम्तीमा ५ देखि १० वर्षसम्म आयकर छुट सुविधा दिने, कम्तीमा पाँच वर्ष लिजलैण्ट लिन नहुने र बैकिङ्ग सुविधा दिनुपर्ने सुझाव सरकारलाई दिइएको छ ।
बाँकेको नौवस्तामा ठूलो क्षमताको औद्योगिक क्षेत्र स्थापना हुने भएपछि पुरानो नेपालगन्ज औद्योगिक क्षेत्रका उद्योगहरु आवश्यकता अनुसार त्यहा स्थानान्तरण गर्न सकिने औद्योगिक क्षेत्र कार्यालयका प्रमुख पुन बताउनु हुन्छ । नौवस्तामा औद्योगिक क्षेत्र स्थापना भयो भने यसले लुम्बिनी, सुदुरपश्चिम र कर्णाली प्रदेशको अर्थतन्त्रमा महत्वपूर्णं योगदान पुग्ने र वस्तु उत्पादनमा मुलुक धेरै हदसम्म आत्मनिर्भर हुने विश्वास गरिएको छ ।