नेपालगन्ज, २४ जेठ । नेपालगन्ज उपमहानगरपालिकामा संचालित शहरी विपद् तथा भूकम्पीय जोखिम पूर्व तयारी परियोजना ९सुपर० को आयोजनामा खोज तथा उद्दार सम्बन्धि दुई दिनको तालिम नेपालगन्जमा सम्पन्न भएको छ । तालिम चार चरणमा संचालन भएको थियो । तालिममा आगलागी, बाढी तथा डुबान र भूकम्पपछिको आधारभूत खोज तथा उद्दार विधि, विपद्का शब्दावली, प्राथमिक उपचार, खोज तथा उद्दारमा प्रयोग हुने उद्दार सामग्रीको प्रयोग र प्रदर्शन गरी व्यवहारिक अभ्यास गराइएको थियो ।
तालिमको समापनमा नेपालगन्जका मेयर प्रशान्त विष्टले विपद् हुनासाथ सबभन्दा पहिला समुदाय नै उद्दारकर्मी हुने भएकोले नगरभित्र स्वयंसेवक तयार गरी विपद् भएको बेला तत्काल परिचालन गरिने बताउनुभयो । नेपालगंज उपमहानगरपालिका वडा नं। ६ का वडा अध्यक्ष एवं नेपालगन्ज उपमहानगरपालिकाका विपद् समिति संयोजक समीरप्रताप सिंहको अध्यक्षतामा तालिम सम्पन्न भएको थियो ।
तालिममा नेपालगन्ज उपमहानगरपालिका सबै वडाबाट प्रतिनिधिमूलक ५९ महिला र ५८ पुरुष गरी जम्मा ११७ जनाको सहभागिता रहेको थियो । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपाल र रेडक्रसको प्राविधिक सहयोगमा नेपालगञ्ज उपमहानगरपालिकामा सञ्चालित सुपर कार्यक्रमको सहयोगमा तालिम संचालन भइरहेको थियो ।
तालिममा सशस्त्र प्रहरी बल नं ३० गण हेक्वाटर बागेश्वरी नेपालगन्जका सशस्त्र प्रहरी नायब उपरीक्षक नवीन बुढाथोकी लगायतको टोली, नेपालगन्ज उपमहानगरपालिका विपद् फोकल पर्सन दिपेन्द्र श्रेष्ठ, नेपाल रेडक्रस सोसाइटी बाँकेका कार्यक्रम अधिकृत प्रहलाद विश्वकर्मा लगायतले प्रशिक्षण दिनुभएको थियो । कार्यक्रमको व्यवस्थापन तथा संचालन सुपर परियोजनाका कार्यक्रम संयोजक रुपन ज्ञवालीले गर्नुभएको थियो ।
