नेपालगञ्ज । राष्ट्रिय स्वतन्त्र पार्टी (रास्वपा) का तर्फबाट बाँके क्षेत्र नम्बर २ का उम्मेदवार विवेक कुमार श्रेष्ठले आफ्नो बाचापत्र सार्वजनिक गरेका छन् । नेपालगञ्जमा आज आयोजित एक कार्यक्रमका बीच श्रेष्ठले बाचापत्र सार्वजनिक गरेका हुन् । बाचापत्र सार्वजनिक गर्दै श्रेष्ठले भ्रष्टाचारको उन्मूलन र सुशासनक आफ्नो मुख्य एजेण्डा रहेको सुनाए । बाचापत्रमा श्रेष्ठले बाँके जिल्लाको समग्र विकासको लागि गरिने कार्यहरु, बाँके क्षेत्र नम्बर २ को विकासका लागि गरिने कामहरु, लुम्बिनी प्रदेश सरकारसंग समन्वयमा गरिने कार्यहरु, नेपालगञ्ज उपमहानगरपालिकासंग समन्वय गरेर गरिने कामहरु र डुडुवा गाउँपालिकासंग समन्वय गरेर गरिने कामहरुको विवरण समेटेका छन् ।
शिक्षा, स्वास्थ्य, सडक, पूर्वाधार, कृषि, पशुपालन, रोजगारी लगायतका एजेण्डा उनले समेटेका छन् । जिल्ला अध्यक्ष हरिपाल सिंह केसीको अध्यक्षतामा सम्पन्न बाचापत्र सार्वजनिक कार्यक्रममा लुम्बिनी प्रदेश महामन्त्री निलराज अधिकारीले स्वागत मन्तब्य ब्यक्त गरेका थिए । कार्यक्रमको सञ्चालन निर्वाचन परिचालन समितिका संयोजक बुद्धिसागर सुवेदीले गरेका थिए ।
