नेपालगञ्ज, १९ माघ । बाँके जिल्लाको सदरमुकाम नेपालगन्जबाट प्रहरीले प्रतिबन्धित लागुऔषध ब्राउनसुगरसहित दुई जनालाई पक्राउ गरेको छ । जिल्ला प्रहरी कार्यालय बाँकेका अनुसार, नेपालगन्ज उपमहानगरपालिका वडा नं. १३ उधोपूर्वाबाट १ ग्राम ८ सय मिलिग्राम ब्राउनसुगरसहित ३६ वर्षीय रोहित पुन पक्राउ परेका हुन्।
जिल्लाको तेलियनपुरमा रहेको प्रहरी चौकीबाट खटिएको प्रहरी टोलीले भे ३ प १४९४ नम्बरको मोटरसाइकलमा सवार पुनलाई नियन्त्रणमा लिएको हो । पुन नेपालगन्ज उपमहानगरपालिका वडा नं. ७ फूलटेक्रा निवासी भएको प्रहरीले जनाएको छ ।
यसैगरी, प्रहरीले नेपालगन्ज उपमहानगरपालिका वडा नं. ११ त्रिभुवनचोकबाट नियन्त्रित लागुऔषध ट्रामाडोल ३५७ ट्याब्लेटसहित ४२ वर्षीय ईरसाद अलि पक्राउ परेका छन् ।
प्रहरीका अनुसार अस्थायी प्रहरी पोष्ट नगरभवन तथा लागुऔषध नियन्त्रण ब्यूरो शाखा कार्यालय नेपालगन्जबाट खटिएको टोलीले अलिलाई नियन्त्रणमा लिएको हो । पक्राउ परेका दुवै आरोपीमाथि थप अनुसन्धान भइरहेको जिल्ला प्रहरी कार्यालय बाँकेले जनाएको छ।
