नेपालगञ्ज, १५ भदौ । नेपाली काँग्रेसका केन्द्रीय उपसभापति धनराज गुरुङ्गले पार्टीलाई बलियो बनाउन काँग्रेसभित्र हार्दिकता आवश्यक रहेको बतउनुभएको छ ।
नेपाली काँग्रेस, प्रशिक्षण शाखा बाँकेद्धारा आज नेपालगञ्जमा आयोजित जिल्लास्तरीय प्रशिक्षण कार्यक्रमको उद्घाटन गर्दै उपसभापति गुरुङ्गले पार्टीलाई बलियो तथा एकताबद्ध बनाउन कार्यकर्ताबीच आपसी सहकार्यको खाँचो रहेको छ भन्नुभयो ।
आगामी निर्वाचनमा नेपाली काँग्रेसलाई स्पष्ट बहुमतका साथ विजयी गराउन सबैभन्दा पहिला कार्यकर्ताहरुको मन माझिनुपर्नेमा जोड दिदै उपसभापति गुरुङ्गले पार्टीतहको प्रशिक्षणले कार्यकर्तालाई आपसमा जोडने काम गर्छ भन्ननुभयो ।
नेपाली काँग्रेस बाँकेका सभापति नारायणप्रसाद गौडेलले बाँके काँग्रेसले कार्यकर्ताहरुलाई निरन्तर प्रशिक्षित बनाउँदै लगेको बताउनुभयो । उहाँले पालिका र वडा तहमा नेतृत्व गर्ने सबैलाई प्रशिक्षित गराउने काम सम्पन्न भइसकेको उल्लेख गर्नुभयो । सभापति गौडेलले प्रशिक्षण कार्यक्रमका माध्यमबाट गाउँटोल हुँदै पार्टीलाई बलियो बनाउने अभियानमा आफुहरु लागिपरेको समेत बताउनुभयो ।
प्रशिक्षण शाखा प्रमुख गोपाल अधिकारीको सभापतित्वमा भएको कार्यक्रमको उद्घाटन सत्रमा नेपाली काँग्रेस लुम्विनी प्रदेशका सभापति अमरसिंह पुन, लुम्विनी प्रदेशका प्रशिक्षण विभाग प्रमुख भुवनप्रसाद श्रेष्ठलगायतको उपस्थिति रहेको थियो ।
प्रशिक्षण उद्घाटन सत्रमा राष्ट्रिय गान तथा लोकतन्त्र प्राप्तीको आन्दोलनमा शहादत प्राप्त गर्ने शहिदहरुप्रति भावपूर्ण श्रद्धान्जली अर्पण गरिएको थियो । त्यस अवसरमा प्रशिक्षण कार्यक्रमका प्रमुख अतिथि उपसभापति गुरुङ्ग, पार्टीका लुम्बिनी प्रदेश सभापति अमरसिंह पुन, उपसभापति भुवन श्रेष्ठ, बाँके सभापति गौडेल, बाँके प्रशिक्षण शाखा प्रमुख अधिकारीलगायतले जननायक विपी कोइराला र संविधानका पिता, पूर्व पार्टी सभापति एवम् पूर्व प्रधानमन्त्री सुशील कोइरालाको तस्वीरमा माल्र्यापण गर्नुभएको थियो ।
प्रशिक्षण कार्यक्रममा बाँके जिल्ला कार्यसमितिका पदाधिकारी तथा सदस्यहरु, महासमिति तथा महाधिवेशन प्रतिनिधिहरु, क्षेत्र, प्रदेश सभा क्षेत्र तथा पालिका कार्यसमितिका पदाधिकारीहरु, निर्वाचित पालिका प्रमुख तथा उपप्रमुखहरु र भ्रातृ तथा शुभेच्छुक संस्थाका केन्द्रीय पदाधिकारी तथा सदस्य र जिल्ला अध्यक्षहरु गरी करीब २७५ जनाको सहभागिता रहेको प्रशिक्षण शाखा सचिव उमा थापामगरले बताउनुभयो ।
भोलिसम्म संचालन हुने प्रशिक्षणको आज पहिलो दिन नेपाली काँग्रेस केन्द्रीय नीति तथा प्रशिक्षण प्रतिष्ठान विभागका कार्यकारी निर्देशक डा. बुद्धिमान श्रेष्ठले ‘नेपालको संविधानः संविधान कार्यान्वयनमा काँग्रेसको भूमिका र दायित्व’, प्रतिष्ठानका निर्देशक डा. कृष्णप्रसाद पौडेलले नेपाली काँग्रेसको तहगत संरचना र नेतृत्व विकास’, ‘सांगठानिक अवस्था र संगठन विस्तारको रणनीति’, नवीन श्रेष्ठले नेतृत्व क्षमताको विकास, विश्वदिप लामिछानेले ‘संगठन विस्तारमा सूचना प्रविधिको प्रयोग र प्रभाव’ र तिर्थ पौडेलले प्रशिक्षणको विधि, प्रशिक्षकका सीप र प्रभावकारीता विषयमा प्रशिक्षण दिनुभएको छ ।
त्यसै प्रशिक्षणको दोस्रो दिन भोलि राष्ट्रिय योजना आयोगका पूर्व उपाध्यक्ष डा.जगदिशचन्द्र पोखरेलले लोकतान्त्रिक समाजवादः नेपाली काँग्रेसको आर्थिक नीति, उपलब्धि र भावि कार्यदिशा र डा.सञ्जय महतोले युवा, रोजगारी र उद्यमशिलताका विषयमा प्रशिक्षण दिनुहुनेछ ।
