कोहलपुरमा कुपोषण व्यवस्थापनसम्बन्धी तालिम सम्पन्न
कोहलपुर, चैत २९ । बाँकेको कोहलपुरमा संचालन गरिएको कुपोषणको एकिकृत व्यवस्थापन सम्बन्धी तीनदिने प्रशिक्षक तालिम सम्पन्न भएको छ ।
बाँके युनेस्को क्लबले हेलन केलर इन्टरनेशनल नेपालसँगको सहकार्य तथा स्वास्थ्य कार्यालय बाँकेको समन्वयमा जिल्लामा संचालन गरेको पोषण परियोजना अन्तर्गत सो तालिम कोहलपुर नगरपालिकामा सम्पन्न भएको हो ।
सो तालिमको उद्देश्य सहभागीहरूको क्षमता अभिवृद्धि गरी समुदाय तथा स्वास्थ्य संस्थास्तरमा गुणस्तरीय पोषण सेवा प्रवाह गर्न सक्षम बनाउनु रहेको क्लबले जनाएको छ । तालिममा कुपोषणको पहिचान, उपचार, प्रतिवेदन प्रणाली तथा सहजीकरण सीपमा विशेष जोड दिइएको थियो ।
कार्यक्रमको उद्घाटन सामाजिक विकास समितिका संयोजक ईश्वरी प्रसाद विश्वकर्माको अध्यक्षतामा भएको थियो भने कार्यक्रमको सञ्चालन कोहलपुर नगरपालिका स्वास्थ्य शाखाका जनस्वास्थ्य अधिकृत प्रेम प्रसाद पाण्डेले गर्नुभएको थियो ।
संयोजक विश्वकर्माले पोषण क्षेत्रमा पहिल्यै दक्षता भएपनि यस तालिमले ज्ञान अद्यावधिक गर्नुका साथै सेवा प्रवाहमा आत्मविश्वास बढाएको बताउनुभयो । उहाँले महिला स्वास्थ्य स्वयंसेविका, सामाजिक अगुवा, आमा समूह र युवा क्लबको सक्रिय सहभागिताले कार्यक्रमको प्रभाव अझ दीर्घकालीन हुने उल्लेख गर्नुभयो ।
अद्यावधिक निर्देशिका अनुसार सञ्चालन गरिएको सो तालिममा प्राविधिक ज्ञान प्रदान गर्न प्रस्तुतीकरण, समूहकार्य तथा व्यवहारिक अभ्यास जस्ता सहभागितामूलक विधिहरू प्रयोग गरिएको थियो । यसले सहभागीहरूको प्राविधिक क्षमता अभिवृद्धि गर्नुका साथै सरोकारवालाबीच समन्वय र सहकार्य पनि सुदृढ बनाएको आयोजकले जनाएको छ ।
कार्यक्रममा स्वास्थ्य कार्यालय बाँकेकी प्रमुख सुनीता पौडेलको विशेष उपस्थिति रहेको थियो । तालिमको सहजीकरण स्वास्थ्य कार्यालय बाँकेकी पोषण फोकल पर्सन बसन्त मल्ल, जनस्वास्थ्य अधिकृत अनिल कुमार सेन तथा जनस्वास्थ्य प्रशिक्षक अमृत राणाले गर्नुभएको थियो ।
प्रमुख अतिथि पौडेलले समुदायको पोषण अवस्थालाई सुधार गर्न प्रभावकारी कार्यक्रम सञ्चालन, सूक्ष्म योजना तथा समयमै गुणस्तरीय उपचार सेवा अत्यन्त आवश्यक रहेको बताउनुभयो ।
कोहलपुर नगरपालिकाका स्वास्थ्य शाखा प्रमुख अनिल कुमार सेनले सहभागीहरूलाई अद्यावधिक प्रोटोकल अनुसार काम गर्न आग्रह गर्दै महिला स्वास्थ्य स्वयंसेविकालाई अभिमुखीकरण गर्ने, पालिकासँग सहकार्य गर्दै पाँच वर्षमुनिका बालबालिका र गर्भवती महिलाको स्क्रिनिङलाई प्रभावकारी बनाउनुपर्नेमा जोड दिनुभयो । साथै उहाँले बाँके युनेस्को क्लब र हेलन केलर इन्टरनेशनल नेपाललाई प्राविधिक तथा आर्थिक सहयोगका लागि धन्यवाद व्यक्त गर्नुभयो ।
तालिममा कोहलपुर नगरपालिकाका वडा नम्बर १ देखि १५ सम्मका २४ जना स्वास्थ्यकर्मीहरूको सक्रिय सहभागिता रहेको थियो ।
